МИА новости

Охридскиот театар со премиерна изведба на претставата „Сирано“

Охридскиот театар утре премиерно ќе ја изведе претставата „Сирано“, работена според текст на Душан Ковачевиќ, а во режија на Ѓорѓи Ризевски.

Режисерот на претставата Ризевски, кому ова му е седма режисерска поставка, рече дека генералната идеја на овој проект и од продуцентски и од уметнички аспект е да се остане не само физички, туку и психички здрав, во време на карантини наметнати од коронавирусот.

-Претставата се бави со темата театар, поврзана со денешницата. Мислам дека во ова време што ни се случува малку замре културата. Генерално најдовме некоја комфорт-зона…Треба да се тера напред, да се работи култура, театар, изјави режисерот Ризевски.

Самата претстава е хиперреалестична трагикомедија, антихумор што реално ги искажува проблемите на театарот денес.

-Нашата претстава се вика „Сирано“, иако оригиналниот текст на Душан Ковачевиќ е „Лари Томсон“, едно од неговите последни дела. Иако текстот е напишан одамна, тој е актуелен во денешницата бидејќи буквално на комичен начин ги искажува проблемите со кои денес се соочува театарот односно културата на овие простори, вели тој.

Улогите во претставата ги толкуваат Горан Стојаноски, Никола Тодоровски, Филип Кипровски, Ивица Цонев, Павел Маслов и Биљана Билаловиќ Вељаноска.

Премиерната изведба на „Сирано“ за прв пат од формирањето на театарот во Охрид пред десет години ќе биде на Големата сцена на Центарот за култура „Григор Прличев“. Претставата ќе биде изведена согласно здравствените протоколи за заштита од Ковид-19.

Горан Симоновски, директорот на Центарот за култура „Григор Прличев“ во чии рамки функционира охридскиот театар, рече дека „Сирано“ е прва премиерна претстава во куќата оваа година, сопствена продукција финансирана со средства на Центарот.

-За оваа година од Министерството за култура ќе се финансираат две премиери – проектите „Балкански шпиун“ во режија на Љупчо Георгиевски и „Изгубени германци“ на Сашо Миленковски. Од традиционалните манифестации оваа година поддршка од државата добија „Балкански фестивал“, „Охридските староградски средби“, „Прличевите беседи“, Граскиот хор „Лихнидос“и Фолклорниот ансамбл „Бисери“, рече Симоновски.

извор: МИА

Операта „Кармен“ вечер од 19 часот во Националната опера и балет

Операта „Кармен“, ремек делото на Жорж Бизе, ќе биде изведена вечер со почеток во 19 часот во Националната опера и балет.

Диригент е Бисера Чадловска. Во главните улоги настапуваат солистите Зоран Сотиров, Ристе Велков, Злата Тошевска, Катерина Стојановска, Марика Поповиќ, Драган Ампов, Дејан Стоев и Ернест Ибраимовски, а во улогата на Кармен, премиерно ќе настапи Николина Јаневска.

Настапуваат хорот и оркестарот на Националната опера и балет.

Настанот ќе се одржи според протоколите предвидени со моменталната состојба предизвикана од пандемијата Ковид-19 за одржување настани, одобрени од Комисијата за заразни болести. Задолжително е носење на заштитна маска.

 Влезот за публика ќе биде отворен еден час пред почетокот на настанот. Билетите се во строго ограничен број!

Седум години по објавувањето, се поголем интересот за збирката раскази „Мојот маж“ од Бужаровска

Седум години по објавувањето, се поголем интересот за збирката раскази „Мојот маж“ од Румена Бужаровска, објавена на германски јазик со што ова дело стануава достапно за читателите во Германија, Австрија и Швајцарија, а наскоро се очекува и фрнацуски превод во издание на Галимар, издавач со богата и долга традиција. 

-„Мојот маж“е објавена и во САД, Велика Британија, Ирска, Италија, Унгарија како и во сите земји од поранешна Југославија каде што Бужаровска се доживува како една од најголемите регионални ѕвезди во книжевноста. Во Македонија оваа збирка има шест изданија, а неодамна Или-Или го објави и првиот превод на албански јазик, стои во соопштението од издавачката куќа Или-Или. 

Според мотивите од овие раскази поставени се и истоимените претстави на сцената на Драмски театар од Скопје во режија на Нела Витошевиќ, на сцената на Словенско младинско гледалишче од Љубљана во режија на Ивана Ѓилас, а за 30 март е закажана премиерата во Југословенско народно позориште од Белград во режија на Јована Томиќ.

извор: МИА

Велешкиот театар со претставата „Кралските копилиња“ ќе настапува онлајн на Интернационалниот фестивал „Сараевска Зима“

Театарот ,,Јордан Хаџи Константинов- Џинот“ од Велес, со претставата „Кралските копилиња“,на 15 март ќе настапи онлајн  на 47-то издание на фестивалот „Сараевска зима“. Поради пандемијата фестивалската програма во најголем дел ќе биде прикажана онлајн, односно претставите ќе се одржуваат на матичните сцени, а сараевската публика ќе ги проследи преку видео стриминг.  

Како што појаснуваат од велешкиот театар, претставата „Кралските копилиња“ од Сашо Димоски, во својата жанровска дефиниција е театар на телото во епски слики, работена според пост-тројанскиот митски циклус, сместен во кралската куќа Арг. 

„Кралските копилиња“ е приказна за боголуѓето која се случува непосредно по завршувањето на војната за Троја и зборува за неможноста траумата да биде избришана како цивилизациско наследство и за кругот преку кој таа траума комуницира со секое време и простор. 

Автор на текстот, режисер и автор на аудио-визуелниот концепт на претставата е Сашо Димоски, режијата на сценското движење е на Васил Зафирчев, видео-дизајнот и анимациите се на Данчо Стефков и Крсте Шупев, сценографијата е на Филип Коруновски, костимографијата на Катерина Чукниева, музички соработник е Сашко Костов, а автор на дигиталните скулптури и плакатот е Адам Мартинакис. 

Во претставата настапуваат актерите Васил Зафирчев како Агамемнон, Кети Борисовска како Клитемнестра, Талија Настова како Електра, Жарко Спасовски како Орест, Маја Љутков како Касандра, Фаик Мефаилоски како Егист и Марија Стефановска како Ифигенија

Месецот на Франкофонијата ќе почне со премиера на филмот „Совршената дадилка“

Манифестацијата „Месец на Франкофонијата“ ќе биде отворена в четврток со премиера на филмот „Совршената дадилка“ од 20 часот во Кинотеката, во организација на Францускиот институт во Скопје.

Се работи за екранизација на истоимениот познат роман на Лејла Слимани, за кој авторката во 2016-та ја доби Гонкуровата награда, а е во режија на Лиси Борлето, снимен во 2019 година.  Главните улоги ги толкуваат Карин Вијар, Лејла Бекти и Антоан Рајнхард.

Според критиката, филмот е особено напнат трилер во стилот на Хичкок и Полански, суптилен и динамичен, кој совршено ги отсликува стравовите на модерното време.

Пред проекцијата, ќе биде промовиран преводот на македонски јазик на истоимениот роман објавен од „Антолог“, чие издание е поддржано од Францускиот институт во Париз, во рамките на програмата за поддршка на издавачката дејност во други земји.

Настанот ќе се одржи согласно со здравствените протоколи за заштита од КОВИД-19 и ќе може да присуствуваат ограничен број  посетители.

Објавен 19-тиот меѓународен конкурс за Стрип- Велес 2021

Стрип центарот на Македонија со седиште во Велес го објави, традиционалниот, 19-ти  по ред меѓународен конкурс за Стрип. Рокот за испракање е до 20-ти септември  2021 година, а право на учество имаат сите автори од цел свет, без разлика на полот и возраста.

Томе Трајков од СЦМ-Велес појаснува  дека должината на стрипот треба да биде од една до шест табли, и тоа на А4 формат, мин. 300дпи ако се испраќа електронски. Доколку стрипот е на една страна треба да биде со најмалку  пет слики. Тој напоменува дека доколку стрипот е во боја, препорачливо е истиот да се испрати преку пошта или да се достави лично.

-Стриповите нема да бидат вратени, со самото испраќање организаторот се стекнува со право да ги објавува и презентира заедно со авторите во рамки на промоција на своите активности, вели Трајков.Tемата на стрипот е слободна. Секој автор без разлика дали е цртач, туш, колор, може да учествува со само еден стрип. Исклучок има за сценаристите каде се дозволува едно лице да направи сценарио за повеќе стрипови.

Учесниците коишто се во основно образование треба да се насочат кон своите основни училишта заради раширување на информацијата, организирано пријавување, како и избор на тема за цртање. На еден стрип можат да работат повеке автори (притоа да се напише кој што направил: сценарио, молив, туш…)
Заедно со стрипот да се испрати лична биографија (име и презиме со фотографија, дата на раѓање адреса, и држава од каде е авторот, е-маил како и година кога е стрипот нацртан. Исто така, на сите стрипови треба бидат наведени авторите, како и називот на стрипот.Пристигнатите стрипови, без овие информации, нема да бидат земени предвид за награди.Стриповите од македонски автори треба да бидат на македонски јазик и кирилско писмо, исто така, сите пристигнати стрипови ќе бидат земени во конкуренција за излагање на  изложбата на Салонот на стрип со реална можност за друг вид промоција.Пристигнатите стрипови ќе бидат разгледани од тричлена интернационална комисија којашто ќе направи избор и ќе ги предложи востановените награди.   Прва награда, е 200 евра,  ”Златен стрип ” и диплома за прво место,  за втора и трета награда се доделуваат дипломи, предвидени се награда за најдобро сценарио, награда за најдобар млад автор до 18 години и други специјални награди. 

– Секако дека има место за оптимизам за македонскиот стрип, само еден пример е  масовното учество на млади македонски автори на интернационалниот стрип конкурс организиран од наша страна (повеќе од половината беа токму нивни стрипови). Создаваме стрип јадра и во уметнички училишта и академии.  Создаден е процес и нема запирање. На стрип авторите може само да им порачам помалку зборување повеќе работа, изјави Трајков.

Додаде дека се свесни за континуитет кој ги ставил најблиску до улогата на „чадор“ организација на македонскиот стрип.

-Задоволни сме од поддршката што македонскиот стрип ја има во овогодинешната Годишна програма за култура 2021, потенцира Трајков.

Испраќањето може да се изврши преку Е-маил:stripkonkurs@gmail.com или на адресата Стрип Центар на Македонија – Велес, Ул. Васил Горгов, бр.78 ,1400 Велес ,Република Македонија.

Рокот за испракање е до 20-ти септември  2021 година

Концерт на Јордан Костов Квинтет вечер во МКЦ

Јордан Костов Квинтет вечер во 20 часот ќе има концерт во кино „Фросина“, Младински културен центар.

Како што најави дискографската куќа „ПМГЏЕЗ“, во Младинскиот културен центар ќе биде реализирана серија од три концерти во живо на македонска џез музика и современа класика, со почитување на мерките за заштита од КОВИД-19. 

 Јордан Костов е композитор, хармоникаш и инспиративна фигура со четири изданија за „PMGJAZZ“. „Come Back“ е насловот на најновото издание, кои деновиве се појави на pmgjazz.bandcamp.com и на сите добри интернет музички платформи. Во формацијата Јордан Костов Квинтет, освен авторот на хармоника, членови се и Андреа Мирческа (контрабас), Филип Букршлиев (гитара), Дамјан Грујо (перкусии) и Драган Теодосиев (тапани).

На 5 март, концерт ќе има нашиот еминентен пијанист и композитор Дино Имери. Тој за „ПМГЏЕЗ“ неодамна го издаде соло пијано албумот „Reflections“. 

Последниот концерт е планиран за 12 март, а својот албум првенец, ќе го претстави триото на Филип Букршлиев. 

„ПМГЏЕЗ“ е дискографска куќа која постои речиси три години и е фокусирана на издавање на современа македонска џез, класична и етно музика. Зад себе има 22 изданија, еден реализиран фестивал (Крај Вардарот Џез, лето 2020) и богата концертна активност.

Концерт на Филхармонија „Бетовен: Редефиниција“

Оркестарот на Филхармонија денеска со почеток во 20 часот ќе одржи концерт насловен „Бетовен: Редефиниција“. Како солист ќе настапи виолинистот Јонијан Илијас Кадеша, диригент ќе биде маестро Емил Табаков од Бугарија, а како дел од програмата се „Варијации на тема од Хајдн“, опус 56 од Јоханес Брамс и Концерт за виолина и оркестарот во Де-дур, опус 61 од Лудвиг ван Бетовен.

Маестро Емил Табаков е роден 1947 година во Бугарија. Табаков се смета за еден од најзначајните диригенти на овие простори. Има дипломирано на одделот за диригирање и одделот за композиција. Тој има освоено награда на натпреварот за млади диригенти „Николај Малко“ во Копенхаген. Има настапувано како гостин-диригент во Австралија, Австрија, Англија, Германија, Данска, Италија, Израел, Канада, Јапонија, Јужна Кореја, Романија, Русија, САД, Сингапур, Холандија и Шведска. Има диригирано на многу оперски спектакли во Венеција и во Торино, досега реализирал повеќе од 250 симфониски и оперски записи за голем број музички куќи.

Јонијан Илијас Кадеша има грчко-албански корени, а живее во Берлин. Неговата изведба се карактеризира со стилска посветеност и егзактна артикулација во интерпретацијата на дела од сите музички епохи. Кадеша секогаш трага по имагинацијата на звукот, постојано барајќи нови звучни хоризонти. Добитник е на повеќе интернационални награди меѓу кои и на натпреварите „Виндзор“ и на „Леополд Моцарт“. Кадеша веќе настапува на водечките светски сцени и на познати фестивали во Европа. Во август, 2020 година, по неколкумесечна коцертна пауза во германската престолнина, тој го отвори фестивалот на „Млади европски класици“ во Берлин.

Покрај концертот во Филхармонија, тој ќе го изведе и Концертот број 2 за виолина и оркестар од Шостаковиќ заедно со Државниот симфонски оркестар во Атина и со камерниот оркестар „Лондон Моцарт плејерс“. Кадеша е коосновач на триото „Гаспард“ со кое настапува во Европа и во САД, а свири на виолина изработена од Џовани Батиста Гуаданини од 1749 година.

Виолинскиот концерт во Де-дур опус 61 за виолина и оркестар од Лудвиг ван Бетовен премиерно бил изведен во Виена во 1806 година. Ова е единствениот виолински концерт на Бетовен и едно од неговите најлирски дела. Напишан е во еден од неговите најкреативни периоди, кога создал многу значајни дела. Му го нарачал виолинистот Франц Клеменет, кој сакал драматично дело за неговиот следен концерт. Бетовен го завршил за кратко време, непосредно пред концертот.