авалон продукција

Tag.

Скопје се враќа на старото нормално

Скопје се враќа на старото нормално

После 1.5 година, Скопје и љубителите на музиката конечно добија можност да се потсетат на старите добри времиња, времиња на музика, концертна магија, на настапите во живо, време на слобода, rock and roll и позитивна енергија.

фото: Стефан Рајхл

На Скопје вчера му се случи исклучителен рок кој присутните сигурно ќе го паметат како посебен. Носталгијата и потребата за музички случувања во живо очигледно беше само мотив плус за безрезервен изблик на позитивни енергии кои доаѓаа и од страна на бендот и од страна на публиката.

Иако со задоцнување во однос на закажаниот почеток, што повторно потсети на старите времиња, како предгрупа се појавија младите и енергични The backdoor band од Охрид кои дополнително ја загреаја атмосферата пред појавувањето на легендарниот ју-рок-бенд Рибља чорба.

Заблагодарувајќи се пред присутните, најавија дека ова за нив е втор настап пред публика после долго време и дека се дојдени да ја пренесат сета својата енергија и музика пред Скопје.

Физичката исцрпеност на Бора, иако видлива, остана во сенка на неговиот умешно лежерен стил. Потпрен на столче, совршено диригирајќи го својот бенд, овој настап го претвори во исклучително енергичен и моќен спектакл.

фото: Стефан Рајхл

Мешавината од стари, но и нови хитови, ги размрда сите присутни, од првиот па до последниот ред, наизменично шетајќи ја публиката низ меморијата во која се запишани старите добри времиња и надежта за враќање кон токму таквото нормално.

Официјалниот дел беше предвидено да заврши со “Анџеле” која беше изведена со музички стил и карактеристики кои кореспондираат на бенд кој е на врвот на својата музичка кариера. Желни за музика и уште хитови, публиката буквално го враќаше бендот неколку пати на бис, при што кулминацијата се постигна кога Бора Чорба и бендот ја диригираа публиката и само со одржување на ритам ја натераа од почеток до крај да ја отпее во полн глас ”Лутка са насловне стране”

Иако и тоа делуваше дека е крај, аплаузот и емоциите го вратија бендот уште еднаш, за уште малку од “амстердам”, “авионе сломичу ти крила” и “волим, волим жене”.

Под доминација на видлива енергија и желба за свирење, бендот звучеше прекрасно. Страста кон рок музиката, потребата од сцена и уживањето во енергијата која доаѓа од публиката се за секоја пофалба и потврда дека токму тоа е начинот на кој се докажува заслуженото опстојување на музичката сцена сите овие години.

Со прекрасна организација, одличен звук и светло, Авалон уште еднаш го потврди доброто чувство за она како навистина треба да изгледа еден настан и што навистина и треба на публиката.

Енергијата, емоциите и добрата музика го вратија Скопје и публиката во убавото нормално.

Се надеваме дека само така ќе продолжиме…

Рок викенд во Скопје

Рок викенд во Скопје

–Затоа што музиката е колективниот имунитет на општеството–

Skopje Unplugged 2021

Во посебен акустичен амбиент и под отворено небо, годинава, Скопје ќе се дрма во звуците на балканските рок легенди „Ван Гог“. Со почеток во 18:30 часот, на кровот на паркингот на „Сити Мол“, публиката уште еднаш ќе ги спои своите гласови во едно грло, рецитирајќи ги стиховите кои ги обележаа последните три децении. Впечатлив е податокот што бендот ќе настапи со екслузивна акустика, нешто кое не се случило од прославата за нивната триесетгодишнина од постоењето. 

Зајдисонцето присутните ќе го испратат и со најголемиот македонски шоумен Игор Џамбазов, како и со ексцентричниот Фиц од легендарната група „Студени нозе“. Но дали пандемијата ја закржлави публиката или не, ги прашавме, организаторите на несекојдневниот настан, кој несомнено ќе биде топло отпоздравување за уште потоплото лето.

Елементал: Какви очекувања имате, со оглед на тоа дека ова е прв масовен музички потрес по пандемиска згрченост?

–    Нашите очекувања за фестивалот се ентузијастички и позитивни. Имајќи ги предвид фактите дека КОВИД 19 пандемијата е на најслабо ниво од самиот нејзин почеток, големиот процент на вакцинирани граѓани и очекувањата за создавање на колективен имунитет на населението до крајот на летото, очекуваме добра посетеност и одличен настан. Минатата година, кога состојбата со коронавирусот беше далеку полоша од денес, го одржавме Skopje Unplugged 2020 во винаријата „Камник“, со почитување на сите препораки од надлежните и присуство на ограничен број гости, кои на наше огромно задоволство, се придржуваа од почетокот на концертот до самиот крај. И оваа година ќе се почитуваат сите актуелни мерки препорачани од Министерството за здравство, со цел успешен фестивал и добра забава за сите присутни. Впрочем и самата локација е внимателно избрана под отворено небо, на огромно пространство сѐ со цел максимална заштита на посетителите и почитување на протоколите за организација на настани во време на пандемија.   

Елементал: Ќе успее ли публиката да ја даде енергијата која ја акумулирала за време на овој стрес—тест период?

–         Главната поента на „Skopje Unplugged“ е да промовира еден нов концепт на настани во живо, каде присутните се во центарот на случувањата, или што го прави овој посебен „boutique“ фестивал. Изминатата година со пандемијата на Корона вирусот беше тешка и предизвикувачка за целиот свет, а особено за изведувачките уметници, кои беа едни од првите „жртви“ на мерките од здравствените организации, со забраната за настапи во живо. Овогодинешниот line up е внимателно одбран и вклучува музички имиња кои со својот репертоар на присутните ќе им овозможат едно посебно искуство, исполнето со позитивна енергија и во петок очекуваме задоволна публика и добра забава. 

Авалон Продукција и Рибља Чорба

На 27 јуни, на паркингот кој граничи со Аква паркот, Авалон продукција на големо задоволство на публиката, ќе ги донесе звуците на неповторливите „Рибља Чорба“. Групата која на рокенрол тронот се задржа подолго од кубанскиот комунизам, ќе ги изведе своите големи хитови пред публика која е секогаш разновидна, притоа не познава за возраст, јазик или нација. Со песните на Чорба аудиториумот повторно го осознава чувството на братството и единството, на југословенската носталгија. Концертот ќе го отвори предгрупата Backdoor band.

Елементал: Какви очекувања имате, со оглед на тоа дека ова е прв масовен музички потрес по пандемиска згрченост? Ќе успее ли публиката да ја даде енергијата која ја акумулирала за време на овој стрес—тест период?

  • Изминатава година и пол беше навистина тешка за нас како промотери, и воопшто, тежок период за целата музичка и концертна индустрија. Oд друга страна, на макроплан, евидентна е и потребата на народот да се издува –  кога желбата за забава и музика станува психолошка потреба, повеќе од очекувано е дека публиката ќе има енергија соодветна за еден ваков пост – стрес период. 

Елементал: Зошто изборот падна на Рибља Чорба?

-Судбината сакаше после девет месеци од нашиот последен одржан концерт, на Бајага и Инструктори во септември минатата година, првиот нареден да биде баш со бендот во којшто Бајага порасна и се изгради себеси како артист- Рибља Чорба, сигурно еден од најголемите рокенрол состави на Балканот и бенд со најбогат каталог на песни на овие простори.

Eлементал: Годинава што измина не затвори комплетно. Ивент индустријата беше можеби една од најпогодените. Значи ли овој прв концерт после долго време дека веќе имате спремна програма која ќе не извлече од концертниот мрак? И секако, ќе најдете ли сила и начин за нејзина реализација?

  • Како и публиката, и ние имаме акумулирана енергија која е спремна да излезе во форма на креативност и беспрекорна техничка реализација. Спремни сме и на двете полиња; иако околностите се различни, во нас се’ уште живее истиот работнички дух и неговата континуирана животна цел и аспирација – да служи како машина за среќа на народот.

Јована Матевска Атанасова