МИА новости

„Автобиографијата“ на Марко Цепенков, која првпат е адаптирана на современ македонски јазик, ќе биде промовирана вечер на фејсбук-страницата на „Литература.мк“. Токму денеска се одбележуваат 100 години од смртта на Цепенков, нашиот најистакнат собирач на народни умотворби и еден од првите прозаисти и раскажувачи во македонската книжевна историја.

– Својата „Автобиографија“ Цепенков ја пишува во 1896 година за да одговори на прашањето како станал собирач на народни умотворби. Но, ова осовременето издание има цел да го приближи текстот до најмладата публика и да им даде шанса да се запознаат со делата на Марко Цепенков уште во училишните клупи. Марко Цепенков речиси целиот свој живот го посветил на собирање народни приказни, песни и други фолклорни форми и неговата важност за македонската книжевност е непроценлива. Неговото богато творештво со објавени и необјавени дела го сочинуваат повеќе од 5500 поговорки, 800 приказни, 150 песни, 100 гатанки, верувања и клетви, баења, соништа и нивни толкувања, детски игри, речници, описи на занаети итн, наведуваат од Арс Ламина публикации.

Во ова издание на „Автобиографијата“ на Цепенков, посочуваат, направени се неколку адаптации од оригиналниот текст: неговиот прилепски говор е осовременет, според правилата на стандардниот литературен јазик, а текстот е поделен на поглавја за да се олесни процесот на читање. Изданието содржи и поговор од проф. д-р Наташа Аврамовска од Институтот за македонска литература при Универзитетот „Св. Кирил и Методиј“.

Модератор на онлајн-настанот ќе биде уредникот на изданието Ведран Диздаревиќ, додека осврт на делото и на опусот на Цепенков ќе даде Славица Србиновска, професорка на Филолошкиот факултет „Блаже Конески“ при универзитетот „Св. Кирил и Методиј“.

Изданието е објавено од издавачката куќа „Арс Ламина“, како дел од едицијата „Читанки“. мс/скс/

извор:МИА

На малата сцена во Македонскиот народен театар задутре (30 декември) напладне ќе има премиера на монодрамата „Последната лента на Крап“ од Семјуел Бекет, во изведба, режија и продукција на Ѓорѓи Јолевски.

МНТ соопшти дека „Последната лента на Крап” е претстава за и- золацијата и стареењето, за кревкоста на сеќавањето, за нашиот комплексен однос со технологијата, за свет во кој времето неповратно минува и бројните ограничувања со кои не соочува животот.

– Ова е претстава за осамен човек, изолиран од светот, кој на неговиот 69-ти роденден ги преслушува старите магнетофонски ленти. Меѓу нив една лента има посебно место: таа што се наоѓа во Кутија три – ролна пет. На неа е снимен тој, средовечниот Крап, пред цели 30 години, одамна минато време, каде што зборува за уште подалечни, а клучни настани од својот одамна изминат младешки свет, за изгубената љубов, за смртта на неговата мајка, за илузиите и неуспешната кариера. А стариот Крап, сега има амбивалентен однос кон тоа што го слуша, најави МНТ.

Претставата е копродукциски проект помеѓу Македонскиот народен театар и Перипетија-продукција од Скопје. Продуцент е Ѓорѓи Јолевски, а извршен продуцент е Никола Кимовски. Текстот од англиски на македонски го преведе драматургот Владимир Јанчевски. Сценографијата, дизајнот на плакатот и програмскиот каталог се на Сергеј Светозарев, а костимограф на претсвата е Ивана Каранфиловска-Угуровска.

Билетите се достапни онлајн на веб-страницата како и на билетарницата во МНТ.  Билетарницата работи во понеделник и вторник од 12 до 18 и среда од 9 до 14 часот. хс/дма/

Промовирана е книга „Сеќавања за иднината“, автобиографски рефлексии на Цветко Смилевски, издание на Бизнис академија Смилевски-Скопје и БАС Институт за менаџмент-Битола.

Според универзитетскиот професор и македонски дипломат Ѓорги Филипов, рецензент и промотор, книгата на професорот Смилевски е прекрасна за читање и се одликува со специфичен пристап кон еден автобиографски поглед врз себеси и своето дело.

– Книгата „Сеќавања за иднината“ претставува извонредно четиво од областа на менаџирањето на себеразвојот прикажан во вид на невообичаен инвентивен пристап, избегнувајќи ја вообичаената хронолошка структура кај овој вид авторски дела. Делото дава насоки како да се постави основната задача на човека, да остави трага на своето постоење за генерациите по него, некаде во иднината да се сеќаваат на него, како што тој, авторот Смилевски раскажува за минатото, за да иницира следбениците да ги користат неговите искуства и да успеат во иднината. Книгата обилува со фотографии кои ја прават уште поубава и затоа визуелните рефлексии ги надополнуваат вербалните. Професорот Цветко Смилевски преку наставата за кадровски менаџмент на постдипломските студии на Институтот за социолошки и политичко-правни истражувања во Скопје, е прв којшто го воведе поимот менаџмент на Универзитетот УКИМ, нагласи промоторот Филипов и додаде дека како рецензент и промотор сакам да кажам дека сè што направил професорот Смилевски можам да го опишам со еден збор – импозантно.

Во книгата „Сеќавања за иднината“ автобиографски рефлексии на Цветко Смилевски публициран е животниот и професионалниот пат на авторот од неговото родно Сливово преку образовниот процес во Битола и Риека, основањето на Бизнис академија Смилевски-БАС, неговиот менторски и друг придонес во заедницата.

– Книгата е посветена на децата на моите деца, но и на учениците на моите ученици како моја посветеност за идните генерации. Користејќи ја оваа книга можете на вашите ученици, на вашите идни генерации да им покажете дека можат да најдат нешто корисно и употребливо. Секое дело вреди онолку колку што ќе биде читано. Јас се надевам дека тоа ќе се случи, порача професор д-р Цветко Смилевски, автор на книгата.

На онлајн промотивниот настан пригодни обраќања имаа универзитетските професори Живан Живковиќ, Слободан Ќамиловиќ, Даниела Андоновска Трајковска и Гордана Тасевска, како и поранешниот македонски министер Ѓунер Исмаил.

превземено од МИА, Марјан Танушевски, Битола

Младински културен центар денеска соопшти дека е подготвена специјална новогодишна програма со концерти, диџеи, готвење, смеење, поезија и по некој поздрав и честитка од публиката на МКЦ.

Под слоганот „Чао 2020“, новогодишната програма ќе се емитува на 31 декември 2020 со почеток во 20 часот на фејсбук-страната на МКЦ, на нивниот јутјуб-канал и премиерно на локалната скопска телевизија Едо.

-Како организатори и домаќини на скоро 400 поединечни настани/содржини во 2020, концерти, театарски премиери и претстави, изложби, поетски читања и литературни промоции, филмови под отворено небо, CINEDAYS филмски фестивал низ цело Скопје, „ЗДРАВО МЛАДИ“ музички фестивал во срцето на Скопје, МОТ театарски фестивал во јубилеј од 45 години постојан континуитет и 15 продукции, редно беше да се пробаме и со новогодишна емисија. Конципираме програма што и ние би сакале да ја гледаме доколку сме дома пред екраните, а не на работа, која повторно на драго срце, сепак сами си ја накалемивме, се вели во соопштението од МКЦ.

Во рамки на шестчасовната програма од студиото на МКЦ ќе настапат: Funk Shui, Стојче со диџеј сет од Берлин, Диџеј Фиц со специјален микс топла музика од Порто, Александар Велики, Дина Јашари, Васко Атанасоски, Суперхикс, Rush To Relax или Дамјан Маневски од Љубљана, Atheist Rap со специјален биенален настап за МКЦ од Нови Сад, јавување од подземјето од Shock Troopers и малку џез со Zulu 3.4.

Покрај музичките настапи, со специјален готвачки сет ќе настапи и Никола Исаиловски или познат како Fat Cacko од неговата Fat Kitchen.

МКЦ најавува дека за програмскиот дел што е одреден за хумор ќе настапат Vlad Ilich и Marko Dejanovic, нови, но супернадежни артисти во мегаконкурентниот свет на стендап-комичари. Vlad Ilich како емигрант од Куманово во светски Лондон, успева полека но сигурно да се пробие на лондонската стендап-сцена со своj специјален настап и за Би-Би-Си, а сега и прв пат во земјава и за МКЦ. Во рамки на програмата ќе има и поезија во КЦ 750. мд/мч/

превземено од МИА, Магдалена Ристоманов