Bozinovski

Tag.

“Крај Вардарот сесии” во Аудиокултура со свое винил издание

“Крај Вардарот сесии” во Аудиокултура со свое винил издание

Големите желби резултираат со големи и значајни дела. 

Кога е во прашање музиката, Аудиокултура дефинитивно може да понесе признание за креатор идеи за достојно промовирање на квалитетна музика и врвен звук, до нивно реализирање во големи дела кои чуваат колективна меморија за уникатно музичко доживување и културно надградување.

Една таква музичка приказна е “Крај Вардарот сесии во Аудиокултура”. Ова е приказна во која се испреплетени многу љубов, ентузијазам, креативност, слобода и сплотеност.

Пред повеќе од една година, пасионирани љубители на музиката и врвниот звук ја започнаа со јасна визија и прецизно испланирани детали за секој сегмент на патот кој води, не кон завршеток, туку кон цел музиката да се негува и чува…како инспирација за уште многу идни дела кои ќе ги збогатуваат колекциите од трајни вредности.

Едногодишната реализација на овој проект опфаќа 12 настапи во живо на истакнати музички имиња од ПМГ Рекордингс, внимателно бирање на музички материјал, специјално креирање на поставки од hi-end аудио опрема за секој поединечен настан, врвни акустични услови, снимање, продуцирање и безброј саати посветена комуникација за размена на идеи кон континуирано надградување на основната идеја.

Беспрекорниот акустичен простор на Аудиокултура беше сцена за најголемиот дел од овие настани од кои се креираше материјалот за содржината на винилот. 

Крајот на првата сезона беше обележан со фестивалско издание, како дел од официјалната програма на фестивалот “Крај Вардарот џез”. Во рамки на ова издание, за прв пат беше поставена и изложба од фотографии креирани на настаните кои се одржуваа во Аудиокултура.

Пред крајот на втората сезона, “Крај Вардарот сесии во Аудиокултура” имаше и свое второ фестивалско издание кое беше дел од официјалната ОФФ програма на ИФФ Браќа Манаки во Битола. Во рамки на ова фестивалско издание, Аудиокултура, Теохаров Аудио, Божиновски часовници и накит и ПМГ Рекордингс организираа музичко-креативна работилница со професионални дизајнери пред кои беа споделени детали за суштината на проектот. Резултатот од оваа работилница се 7 прекрасни дизајнерски решенија за омот на винилот “Крај Вардарот сесии во Аудиокултура”.

За визуелното претставување на оваа прекрасна приказна спакувана во винил издание е избран дизајнот на Горјан Главевски.

Неговиот креативен пристап во потполност ја доловува суштината која нас не водеше низ овој едногодишен процес велат креаторите на проектот “Крај Вардарот сесии” во Аудиокултура.

Од другата страна на приказната, доживувањата на истата се фасцинантни. Кон преточување на музиката во слика, Горјан вели:

“Од музика до визуализација. 

Главната инспирација за ова решение доаѓа од самата музика која е врежана на ова специфично винил издание. 

Исто како во џезот, кој е најслободен музички израз базиран врз импровизација и прекршување на сите поставени музички правила, така и центарот на самиот дизајн е неправилна клавијатура која е всушност само дел од пошироката слика. 

Сакав да доловам спокојна прошетка покрај кеј, рефлексија во водата и простор за многу слобода и музика. 

Доминантните бои од предниот дизајн, сината и црвената ги искористив и на задната страна, но тука носат сосема различно значење и претставуваат нешто есенцијално – бакнеж помеѓу машка и женска фигура. 

Дизајнот е позитивно видување на животот и убавите нешта – љубов, музика, игра, слобода…” 

Винилот “Крај Вардарот сесии во Аудиокултура” е лимиторано издание достапно само во Аудиокултура и Божиновски 

Крај Вардарот сесии со Аудиокултура и Божиновски, овој петок во МКЦ

Крај Вардарот сесии со Аудиокултура и Божиновски, овој петок во МКЦ

Крај Вардарот Сесии е заеднички проект на дискографската куќа ПМГЏез и концептуалниот соничен кафе бар Аудиокултура, кој се реализира во соработка со реномираниот македонски бренд за часовници и ексклузивен накит, Божиновски.

Проектот трае веќе неколку месеци, а се состои од реализација на десетина концерти кои ПМГЏез, како реномирана дискографска куќа, ги организира во извонредно атрактивниот и звучно врвно подготвен објект на Аудиокултура. Сите настапи се снимаат, а селекција од најквалитетните мигови ќе се најде на винил издание, кое треба да се појави оваа есен и ќе биде своевиден артефакт од оваа интересна колаборација.

Овој петок, на 19ти мај, Крај Вардарот Сесии за миг ќе излезе од кафе барот на Аудиокултура, всушност, заедно со нивниот звук и атмосфера ќе бидат пренесени во горното фоаје на киното Фросина, при МКЦ Скопје.

Во рамките на четвртото издание на Крај Вардарот Џез Фестивал, ПМГЏез, заедно со Аудиокултура и Божиновски, ќе приредат специјална фестивалска вечер во која проектот Крај Вардарот сесии ќе биде претставен на пошироката јавност на еден малку поинаков начин.

Покрај неколкуте обраќања на темата од организаторите, аудио претставување на материјалот кој ќе се најде на плочата и мал винил базар, посетителите ќе имаат уникатна можност да проследат изложба на фотографии направени во рамките на досегашните настапи од овој проект во Аудиокултура.

Секој од коорганизаторите ќе има свој штанд каде ќе ја претстави својата работа и производи, а вечерта ќе ја крунисаат два концертни настапи, промоции на ноедамна излезени домашни албуми во продукција на ПМГЏез, кој се јавува како организатор на Крај Вардарот Џез Фестивал.

Настанот започнува во 19 часот, влезот ќе биде слободен, а публиката ќе може да ужива во концертите на две уникатни дуа: Букршлиев – Томевски и Кондовски – Дробицки. Ова е извонредна можност да се запознаете поблиску со работата на некои од најактивните културни и дизајн чинители на сцената во последниве години, па повелете.

„Крај Вардарот сесии со Аудиокултура“ во МКЦ

„Крај Вардарот сесии со Аудиокултура“ во МКЦ

Културниот билтен на настани, на 19 мај, бележи целодневен концепт насловен „Крај Вардарот сесии со Аудиокултура“.

Имено, долгорочниот проект „Крај Вардарот сесии“ во Аудиокултура, на 19 мај ќе го реализира осмиот настан од вкупно предвидените 11. Овој пат во МКЦ, преку целодневна програма која преку неколку различни настани ќе ја долови суштината на проектот чија крајна цел е креирање на материјали со кои ќе се збогати не само македонската музичка архива, туку и мемоарите на општествената културна историја.

Проектот од самиот старт беше најавен како концепт кој, преку настапи во живо на истакнати музички имиња, ќе ја надмине основната форма на промоција на квалитетна музика, нудејќи и на публиката уникатни искуства преку низа специфичности својствени за Аудиокултура која одамна е предводник во поставувањето на нови музички, звучни и културно општествени стандарди. До сега, во Аудиокултура се реализирани вкупно 7 настани на кои свои настапи во живо имаа истакнати музички имиња. Од секој од овие настани, реализирани во совршени акустични услови и звучно репродуцирани преку врвните hi-end системи од teoharov audio, е документиран аудиоматеријал од кој на крајот на 2023 година ќе биде издаден винил запис. Осмиот настан од овој концепт ќе има своја проширена варијанта за која Аудиокултура во заедничко партнерство со Божиновски часовници и накит, Теохаров аудио и ПМГ Рекордингс, креираа целодневна програма од тематски настани кои ќе се реализираат во рамки на официјалната програма од четвртото издание на фестивалот „Крај Вардатот Џез“

Реализацијата на истата ќе започне во 19:00 со изложбата на фотографии од Татјана Ранташа, Стефан Рајхл и Благоја Ангеловски. Во оваа прилика ќе бидат изложени дел од фотографите настанати за време на претходните 7 настани од концептот „Крај Вардарот сесии“ во Аудиокултура. Изложбата ќе биде проследена со музика снимена во живо од настаните “Крај Вардарот Сесии” во Аудиокултура, пренесена преку системите од Теохаров аудио. Поставката од фотографии ќе биде изложена во холот на МКЦ до завршување на последниот настан од предвидената програма.

Музичката доминација ќе продолжи во 20:30 часот за кога е закажан настапот во живо на дуетите Букршлиев – Томевски и Кондовски – Дробицки. За изведба на Букршлиев – Томевски се својствени слободна и дискретно структурирана импровизација на нетипични камерни формации. Во оваа прилика, својата уиграност и развиената телепатска вештина за музичка комуникација ќе ја покажат преку промоција на албумот „Something Lonely in the Bone“ во издание на ПМГ Џез.

Пред стартот на последниот настан од овој концепциски, музичко-уметнички ден, Аудиокултура и Божиновски часовници и накит, под чие заедничко партнерство ќе биде издаден винилот „Најдоброто од лрај Вардарот сесии во Аудиокултура“, ќе споделат значајни детали за истиот. Имено, ќе стане збор за деталите на оваа уникатна приказна која обединувачката моќ на музиката ќе ја пренесе, не само преку музиката како таква, туку и преку форматот, дизајнот, бројот на примероци и локации на кои ќе може да се купи ова извонредно парче музика.

Целодневната културна авантура ќе биде заокружена со настап во живо на дуетот Кондовски – Дробицки. Нивната соработка е документирана низ неколку изданија, делумно испланирано, делумно импровизирани, но секако непогрешливо квалитетни.

Она што е особено важно се високите организациски стандарди и промоцијата на врвниот звук својствени за Аудиокултура. Во оваа прилика, специјално за оваа целодневна програма, во МКЦ ќе биде поставен сетап од hi-end системи од teoharov audio преку кој ќе се реализира звучната репродукција на сите тематски настани. Со цел доближување на ова можност за уникатно доживување на музиката и врвниот звук од што поголем број на публика, влезот за настаните ќе биде слободен

Дизајнерска вечера која славеше накит на Моден Викенд Скопје

Дизајнерска вечера која славеше накит на Моден Викенд Скопје

Амбиентот беше минималистички, за рефлекторот кој го поседува човечкото око да биде насочен кон две нешта кои беа значајни за таа вечер. Храната и еден нов бренд на накит кој доаѓа кај нас. Пригушено светло, сјај на свеќи и онаа ведрина на мимозите кои доминираат во оваа сезона, токму за одржувањето на Моден Викенд Скопје, беа дискретно поставени да не пречат на она што е важно.

Необична локација, добро избрано друштво и фантастична храна.

Така Моден Викенд Скопје одлучи да угости 40 личности на една интимна вечера која се случи во рамките на викендот, заедно со Божиновски часовници и накит.

Поводот беше промоцијата на TI SENTO – модерната класика на еден совршен бренд за накит кој доаѓа од Милано, Италија.

Совршеност и необичност имавме на неколку нивоа … Од амбиентот кој ги дочека гостите на старт, до финалето, каде добија сервиран накит пред уживањето во десертот.

Тој спој на необично искуство, гостите сигурно ќе го запомнат, покрај тоа што креаторите на оваа вечера направија во два часа сите сетила да бидат активирани на естетски начин.

Храната секогаш е фокус на една вечера, па FJ Culinary Consultants беа избрани да го подготват менито кое беше составено од наши локални и италијански продукти за да се донесе спој на двете национални приказни на чиниите. Така имаше антипасто од наше цвекло со дресинг направен од состојки од Модена. Наше козјо сирење комбинирано со мармалад од домати од Италија поставен на мус од босилек, грав Бакла од гостиварско со карамелизиран копар, реконструирано турамису со чоколаден, лешников и кафе крем на нашиот производител Леска.

TI SENTO не е само уште еден бренд на накит кој доаѓа на македонскиот пазар, туку е бренд којшто ги крши стереотипите, излегува надвор од стандардната линија, но не само поради потребата од желбата за бунтовност, туку поради желбата да открие нови форми, нови линии и да се обиде да пулсира во истиот ритам со сите наши сетила. На вечерата во чест на новиот италијански бренд дојде и Амбасадотор на Италија Андреа Силвстри.

Ваквите дизајнерски вечери се една убава класика на големите модни недели ширум светот, а кај нас Моден Викенд Скопје со една таква вечера која пред пар години ја помести во еден овоштарник во Преспа, само најави дека сака да ја менува играта кај нас. Преку користење на локални производи, создадени од локални фармери кои го имаат епитетот на здрава храна и одржлива гастрономска приказна. Така што оваа вечера не е само обична средба на избрани личности на една совршена маса.

Ова е место каде се спојува естетиката со одржливоста, глобалното го сретнува локалното на необичен начин преку искуства поврзани со храната создадена за истражување и виното кои се блескав накит на секоја вечера. Кога сме кај вината, изборот од својата колекција на вина го направи Винаријата Камник.

Како што течеше вечерта, така беше откриена убавината на италијанскиот накит кој во Македонија го донесе Божиновски часовници и накит и во чија чест се наздрави со оваа вечер.

Сјај доволен за свое око, сатенска текстура на изработката која ќе ги задоволи оние кои од накитот сакаат врв во она што го носат, а притоа секоја од колекциите нуди посебна приказна во која ќе се пронајдат …

Бескрајно опуштена вечера со свеќи и мимози, со македонска гастрономија и со сјај на Италија во накитот на TI SENTO, на кој кажуваме „Добредојде во Македонија“.

Оваа вечера се случи во рамките на 26. издание на Моден Викенд Скопје, под мотото „Јазикот на етиката и дизајнот“, кој годинава календарски и концептуално се вклопи во Деновите на италијанскиот дизајн во соработка со Италијанската Амбасада во Скопје и Италијанската агенција за трговија ITA и East Gate Mall.

“Случајна” средба со Глигор Кондовски

“Случајна” средба со Глигор Кондовски

Да се отсвири „мир, тишина и слобода“ од својата уметност е можеби и најтешкиот и најобврзувачки предизвик за оној кој сака да остава траги.

Тивкиот и ненаметлив креативец и млад мултимедијален уметник Глигор Кондовски, нè покани токму на таква „случајна средба“, синоќа во скопското „Аудиокултура“.

Ако прашувате што значи тоа, тоа значи дека кога си пред него и кога преку еден креативен музички процес на изведба ги смирува сите твои разиграни делчиња од телото, кожата и умот, но не ги остава ни за миг да се одвојат или оддалечат од процесот, тој успеал да те стави под своја „контрола“. А кога тоа ќе успее, и понатаму заедно сте се поврзале и го водите тој процес, вие заеднички сте успеале да го ставите него под своја „контрола“ … Процесот!

Навидум тоа би било опис за ова синоќешно музичко продолжение на проектот „Крај Вардарот сесии“ на ПМЏ џез, кој уметникот го оствари пред педесетина свои почитувачи.

Не е лесно, верувајте ми, затоа што повеќето уметници претендираат да создадат бука во вас, што секако и тоа има своја вредност, но мирот, тишината и слободата на духот чинам се чекор понапред, барем кај публика кога ја надминала возбудата на тие некои свои бурни години.

И, како што доликува на една камерна топла и пријателска атмосфера, каква што создава овој сè попопуларен скопски клуб, тој беше исполнет со пријатната музика што на сајзер, и на виолина ја изведе Кондовски, но подобро би било да речам ги отшепоти своите ионака шепотливи музички дела. Вбризгувајќи нѝ го својот творечки импулс со осет, од оној највешт осет, ронлив под прсти-полека и леснопримачко.

За да го слушате Кондовски најмалку што ви треба е претсознание за неговата мултимедијалност како творец, а за да го перципирате соодветно, ви треба да имате следено барем по нешто од неговите себереализации на различните полиња на уметноста.

Еве зошто:

-Глигор Кондовски е дипломиран виолинист и магистер по филмско и ТВ сценарио кој денес работи како професор по виолина. Горд сопственик е на шест албуми со амбиентална џез-музика и на бројни музички композиции, а зад себе има и три музички албуми во соработка со џез-музичарот и тромбонист Владан Дробицки и со пејачката Марија Каева. Покрај музичкото творештво Кондовски има реализирано и кратки и документарни филмови и три самостојни изложби со фотографии. Работи и на музика и на филм и на слика, сето тоа ја создава таа богата раширеност, како и поширока рамка своето уметничко тесто да го прелева од еден во друг калап, зависно од своите уметнички илузии, и да го „меси“ по своја желба …

Комбинации многу! „3×1=3“ (аудио, видео и слика × творец), но според калкулаторот на уметноста, пак ќе речам – многу!

Во оваа прилика, 45 минути нè (н)ежнеше со современа, а сепак евокативна музика од својот последен албум, чија звучна репродукција пак се реализира кристално чисто и јасно преку врвните звучни системи „Теохаров Аудио“.

Фактички, го слушавме последниот албум за соло виолина, кој опфаќа шест композиции кои раскажуваат приказни за остатоците од политичките случувања во нашата земја и културно – уметничка катаклизма во светот и дома.

Тој се вика Encounter.

Го слушавме внимателно и релаксирано, со постојано прашање во себе од типот-“колку ли само поливалентна уметност може да има во еден млад човек, и, до каде ќе отиде истата како понатамошен резултат и исход?“

Времето ќе покаже за вториов дел од прашањето, за првиот, горе-долу, одговорот е видлив.

Соседот (на „Аудиокултура“) Влатко Стефановски, намина пред самиот крај и малку фати од настанот, а ние кои ги живеевме тие 45 минути со Кондовски верувам ќе имаме повторно (случајна) средба, rencounter, по наша желба: или крај Вардарот, или повторно во овој наш сега веќе освоен и прогласен за свој музички „аудиокултура дом“.

Валентина Ѓоргиевска Парго

Аудиокултура – сцена која постави нови музички стандарди

Аудиокултура – сцена која постави нови музички стандарди

“Live at Audiokultura”(50 guest limited)  – концепт за восхит

Во густиот хаос на ограничувања, изолации и метеж кои безмилосно ни креираат животна рутина исчистена од благодатите на уметноста, Аудиокултура е сцената која го задоволува гладот за култура.

Урбано, модерно, пријатно, полно со хармонија и спонтаност е сликата која соодветно го опишува овој локал кој стана синоним за уникатност која освојува. Гледано со подетален пристап и анализирајќи го сето она што се случува во една вечер, јасно е дека за Аудиокултура да биде баш онаква каква што е, креаторите и организаторите вложиле огромни количини од префинет вкус, многу љубов, перфектна организација, огромна посветеност, прецизен план и нескротлив ентузијазам музиката и врвниот звук да бидат достојно презентирани и достапни за што поголем број на луѓе.

Утописки, спонтано, навидум лежерно, а сепак толку моќно, Аудиокултура заслужено е поставена како единствено прибежиште и извор за напојување со квалитетна музика и врвен звук.

Во низата на значајни имиња кои го ставиле својот потпис на списокот на изведувачи се запиша и Мухамед Ибрахими.

Предконцертната смиреност со која ги поздрави посетителите навестуваше тивка вечер и музика која ќе остане во рамките на строга формалност. Но само навидум. Стартот донесе нешто сосема друго кое се одржа до самиот крај на настанот. Беспрекорната тишина на публиката хармонично се измеша со неверојатната сплотеност на Мухамед и гитарата. Леснотијата со која го изведе својот соло перформанс предизвика збунувачка привлечност на која никој не одолеа. Задоволно прифаќајќи ја секоја следна нота, публиката неодоливо уживаше во доминацијата на музиката и врвниот teoharov звук кои приуштија вечер за паметење.

Атмосферата на ексклузивност беше надополнета со можноста присутните да го видат прекрасниот часовник Hamilton Ventura од Bozinovski watches & jewelry и да дегустираат две врвни вина од Камник Винарија.

Текст: Bon&Bona

Фотографии: Stefan Rajhl

Посетителите на „Sound. Time. Vision“ на Манаки Офф имаа ексклузивна можност да го преслушаат „МАКЕДОНИСИМО“ на Симон Трпчески пред официјалната македонска претпремиера

Посетителите на „Sound. Time. Vision“ на Манаки Офф имаа ексклузивна можност да го преслушаат „МАКЕДОНИСИМО“ на Симон Трпчески пред официјалната македонска претпремиера

На аудио поставката Sound. Time. Vision на „Теохаров аудио“, „Божиновски часовници и накит“ и „Каре“ посетителите имаа ексклузивна можност да го преслушаат новиот проект на Симон Трпчески „МАКЕДОНИСИМО“ чија македонска претпремиера ќе се случи во сабота во автентичниот амбиент на родното место на неговиот татко  во с. Збажди, во струшка Малесија.

Посетителите во огромен број уживаа во звуците на најафирмираниот македонски пијанист и изведувач Симон Трпчески, како увертира на најавената претпремиера во живописното Збажди.

„Убаво е кога ќе се склопат енергиите и кога ќе создадат нешто неповторливо, како што е случајот со годинешната поставка на Теохаров Аудио која ја креиравме заедно со „Божиновски часовници и накит“ и „Каре“. Покрај тоа што успеавме да обезбедиме ексклузивни аудио матерјали кои тука беа преслушани за првпат, посетителите во текот на целата недела на одржувањето на фестивалот „Браќа Манаки“ имаа можност да уживаат во звуците на филмска музика компонирана за македонски филмови“, изјавија организаторите на Офф програмата на „Браќа Манаки“.

Покрај „МАКЕДОНИСИМО“ на Трпчески, посетителите уживаа и во звуците на музиката на браќата Тавитјан, Влатко Стефановски, како и во музиката од филмовите на најнаградуваниот македонски режисер Милчо Манчевски.

За неповторливото аудио искуство на посетителите се погрижи Теохаров аудио, додека совршениот амбиент во просторот е дело на „Каре“ дел од Смарт Ливинг групацијата, се тоа вкомпонирано во една пријатана „дневна соба“ во централниот дел на најрепрезентативното здание во Битола – офицерскиот дом, составена  со високата естетика и креативност на „Божиновски часовници и накит“.

На последниот ден од поставката  посетителите ќе имаат можност да се дел од претпремиерата на новиот албум на Крсте Роџевски, која со оглед на тоа дека ќе се презентира сеуште необјавен материјал ќе биде достапен исклучиво за ВИП гости – вистински љубители на добриот звук.

„Сите визуелни форми на 7/8 такт“ – Одржана мотивациона работилница за инспирирање на дизајнерите во процесот на креирање на новиот македонски Swatch часовник

„Сите визуелни форми на 7/8 такт“ – Одржана мотивациона работилница за инспирирање на дизајнерите во процесот на креирање на новиот македонски Swatch часовник

Кои се можните визуелни форми на 7/8 такт кои треба да го исцртаат новиот македонски Swatch? Одговор на ова прашање вчера го бараа дизајнери, уметници и илустратори, заедно со музичарот Сашо Поповски и сопственикот на „Божиновски часовници и накит“ Игор Божиновски. Настанот се одржа во Офицерскиот дом Битола, во склоп на off програмата на фестивалот „Браќа Манаки“ како дел од заедничката поставката „Sound. Time. Vision“ на Теохаров аудио, заедно со Божиновски часовници и Каре, додека се преслушуваше музиката на Симон Трпчевски и Браќата Тавитјан.

„Ритамот 7/8 е своевиден татнеж – код кој генерациски се пренесува низ македонскиот народ, раскажувајќи за неговото минато и предвидувајќи ја неговата иднина. Токму тоа овој автентичен македонски код го прави најсоодветна основа според која треба да се издизајнира новиот македонски Swatch. Затоа што токму песните кои се темелат на 7/8 и нивните текстови се сведоци за одредени историски и општествени периоди на нашиот народ. Оттука симболиката 7/8 и неговото поставување на автентичен македонски часовник е навистина голема, одбројувајќи го времето и приказните кои сме ги раскажале, но и допрва ќе ги раскажуваме со најавтентичниот македонски код“, беше заклучено на мотивациската работилница.

7/8 ќе биде втор локален дизајн на часовник со македонски дизајн под платформата „Своч на Кирилица“. Првиот дизајн се појави минатата година по повод 30 годишнината од независноста на Македонија, симболично го носеше името „Дениција“, а беше потпишан од страна на илустраторот Зоран Кардула.

А, која ќе биде визуелната форма што ќе го исцрта часовникот во 7/8? Одговорот овој пат ќе го добиеме преку отворениот повик за дизајнери, илустратори и уметници кој веќе е во тек и ќе трае до 15 септември. Сите заинтересирани илустратори, дизајнери и уметници можат тука да ги прочитаат сите детали во врска со тековниот конкурс.