Презентирана изложбата “5 години Џез Фестивал во Битола“
Со изложбата “5 години Џез Фестивал во Битола“ на авторот Даниел Ѓурчиновски, се отвори шестото издание на Џез Фабрика Фестивалот – Битола 2023.
Изложбата која беше презентирана во Кристалната сала на Културно информативниот центар, е во рамките на споредната програма на фестивалот.
„Даниел е нашиот идеен творец, дел од тимот кој го создаде фестивалот и секако наш арт директор“, истакнуваат организаторите на фестивалот.
Изложбата е и во рамките на годишната програма на ЈОУ КИЦ Битола и истата содржи автентични фотографии од музичките настапи на џез музичарите кои во изминатите пет години настапиле на битолскиот џез фестивал „Jazz factory fest“.
Ѓурчиновски е официјален фотограф на Џез Фабрика Фест и се погрижи и за изгледот на годинешниот плакат на фестивалот.
Музичката програма оваа година ќе се одржи од 13 -ти до 15- ти април со настапот на повеќе реномирани џез музичари од Македонија и странство.Фестивалот ќе биде отворен со настапот на Баба Сисоко од Африка, Тони Китановски од Македонија и Васил Хаџиманов од Србија.
Фотографии : Студио Карали Битола
