Новости Archives

“HELLO WORLD” – Деби албумот на Stoned Hedge е достапен на сите дигитални музички платформи

HELLO WORLD! По промоцијата на својот прв сингл “Little Heads”, младиот инди-рок состав Stoned Hedge денес (28.05.2021) го издава својот прв студиски албум под етикетата на Пасворд Продакшн.

Stoned Hedge е млад инди-рок бенд од Тетово, формиран во 2018-та година. На самите почетоци, бендот свири преработки насекаде низ Македонија, за во август 2020-та година да почне да создава авторска музика. Бендот е составен од 4 члена: Ангела Маринковска – вокал, Исмаил Камбери – гитара, Дејан Томовски – бас и Марко Стојчевски – тапани.

Албумот насловен “Hello World” се состои од 8 песни кои жанровски се движат во рамките на алтернативниот рок, а звучат толку зрело, небаре ги компонирал искусен бенд со долгогодишно искуство. Истите се подготвени за само четири месеци, а се снимени и продуцирани од страна на Дени Крстев (Bernays Propaganda, My Tear) во Студио 1060.

“Она што овие млади луѓе го направија во тој краток период е навистина за восхит, а тоа се големи и неверојатно мелодични песни кои лесно ќе ве заведат со својата питкост и искреност и ќе ве однесат во светот и борбата на убавите, чесните и младите. Станува збор за една борба со силен и невидлив противник, но Stoned Hedge во стил на искусни борци со неверојатна леснотија на сите нас ни покажаа дека со талент и чисто срце може да звучиш и изгледаш светски. Да, драги слушатели и гледачи… тука станува збор за светска класа на трагот на Guano Apes и Portishead. Во нивните песни можете да најдете многу убави и неочекувани нешта како: прекрасни и меланхолични вокали, волшебни и ненаметливи гитари, сонливи и сугестивни бас делници, разбивачки и нежни тапани…и искрени зборови!!! Тие креираа еден убав свет кој повеќе нема да постои само во нивните срца и глави, туку благодарејќи на волшебните мелодии на насмеаните ежиња сите ние можеме да бидеме дел од нивната магија… и да, конечно да се опуштиме и да уживаме.” – Васко Атанасовски (Bernays Propaganda, 21 Vek)

Од денес, HELLO WORLD е достапен на поголемите дигитални музички платформи како Spotify, Apple Music, Amazon Music, Deezer, Tidal, Youtube, Bandcamp. Може да се чуе на следниот линк:

Stoned hedge – Hello World

Доколку ви се допаѓа нивната музика, ќе имате можност да го поддржите бендот преку купување на merch-от кој што ќе биде изложен на слушачката промоција на Hello World, која ќе се одржи на 28.05 (петок) на платото пред Младинскиот Културен Центар, со почеток од 19 часот.

Facing the sun – нов албум на Бобан Мирковски

Додека музиката доживува прогрес на неизбежна дигитализација, Бобан Мирковски е македонскиот музички примариус, еден од малкумината, кој се посветуваат на коренот, на рачно и виртуозно создавање. Мирковски со својата страсна изведба го овековечува митот дека во класичната музика се крие генот на интелектот.

Негувајќи звуци на небесно смирение, младиот пијанист Мирковски, како едно видување низ слухот, го носи слушателот во бунило на сетилна аберација.

Современик на музичката генијалност на својот ментор Симон Трпчевски, на филхармониско блаженство, распостила музика чија акустика отсвирена во сала не може да ја замени ниту еден компјутерски софтвер.

Неговиот најнов албум „Facing the sun„ крие вешто смислен симболизам на сончоглед свртен кон сонцето, неслучајно одбран, зашто симфониите отсвирени од клавишите и нотните тетратки на Мирковски се како зраковно помазание, заживуваат и на изгревот, па дури и на залезот сончев.

Албум кој се слуша во темница, , во оној ист амбиент во кој и Шопен творел, крај запалени свеќи, со отворена душа и провев помеѓу мислите. Сонатите отсвирени од неговите прсти имаат различен одек кој се чини како да извира од срцето, од коморите, се шири низ периферијата на секое ткиво. Звуците на Шопен и Хачатуријан со својата пасторалност, техничка изведба, амортизирана до најмала милисекунда, до метрономско пулсирање, се опојни и набрзо стануваат приоритетни композиции, кои во комбинација со неоспорната музичка дарба на Мирковски се една симултана експресивност.

Својство на катарза, на прочистување, на прочепкување по внатрешноста на ушната школка, внимателно, би се рекло математички, одбрани композиции да се постигне една аудитивна нирвана, тактилни преобразби од звук во емоција, од емоција во физички допир.

Албумот „Facing the sun“:

-поттикнува: тивки мисли и инспирација

– е погоден за : релаксирана прошетка во природа

–e идеално комбиниран со: чаша вино и добра книга

Преслушај: https://bobanmirkovski.com/en/music/new-album/?fbclid=IwAR1skH_r3ughvjezIc_ecbBtI5irOPTRz4cO-y13I7z9-xiOwIBwBCJ6yps

Бобан Мирковски(1991 год.) е македонски пијанист, професор по пијано при ДМБУЦ “Илија Николовски – Луј“ Скопје. Дипломирал на ФМУ , во класата на професор Симон Трпчевски. Две години подоцна магистрира во класата на професор Александар Сердар.

Има освоено повеќе меѓународни награди , од кои позначајни се: Двете први места и еден Лауреат на „Арс Косова“, три последователни години (2006-2008 год.); Лауреат на меѓународен натпревар „Македониум М“ во Скопје (2007год.); Прва награда на меѓународен натпревар „Даворин Јенко“ во Србија…

Има настапувано во светски рамки низ музичките хали ширум светот.

автор: Јована Матевска Атанасова

Поема од Томислав Османли во чест на столетието на Блаже Конески

Во издание на „ВиГ Зеница“ деновиве излезе од печат поемата „Бдеења Блажеви“ со поднаслов „Пеења до потомците“ од писателот Томислав Османли. Авторот познат по неговото прозно творештво, за прв пат се јавува со поетска книга. Својата поема Османли ја напиша во чест на стогодишницата од раѓањето на Блаже Конески, темелникот на македонската современа лингвистичка и книжевна култура.

Книгата е проследена со два исклучителни книжевни осврти, едниот од книжевникот Ристо Лазаров и вториот од поетот, критичар и издавач Глигор Стојковски.

„Горчливи пластови има во нашата стварност, осакатени животи, судбини, души“ – пишува Ристо Лазарот во предговорот кон поемата: „Сака пред овој кошмар да се застане храбро, лице в лице. Баш така е застанат поетот, баш така како што му прилега на вистински Потомок на великиот Блаже Конески. Тоа веднаш се препознава низ сиот тек на поемата – дело на вознемирен и загрижен, грижодушен човек и автор. Тој инспиративно, на свој начин, ја расветлува големата, титанска моќ на идејата на Блаже Конески.

„Томислав Османли не можел да избере посоодветен лик во поемата и посоодветен пристап за да ги пренесе своите затемнети (прет)чувства – пишува писателот Глигор Стојковски во својот опсежен книжевен осврт насловен „Тревожен вик“, и додава – Блаже Конески овозможува пробивање во најдлабоките, најсуштинските национални обележја, поетскиот исказ, пак, со ритам наметнат уште во првите стихови и доследно одржан до последните, со благите метафорички преливи, со здржани емотивни и со нагласени мисловни поентирања – создава комплетно поетско дело…“

Лајтмотив на поемата со која се чествува Столетието на Конески, се неговите песни „Татковина“ и „Снег“ кои припаѓаат на два тематски корпуса на големиот македонски лирик. Поемата „Бдеења…“ е посвета, во доба „на неспокои и несоници“ на Конески како најблагороден израз на македонскиот дух чија идеална татковина е јазикот, а лирски израз досегањата на естетската убавина: „Не почивам, а живеам јас/ во белине мугри,/ во јазикот на упорствата и на добрината/ живеам во зборот осончан/ од татковината,/ во радоста од слободата/ во спокојот / од убавината.“ – стои забележано во поемата „Бдеења Блажеви“

Во својот предговор „По патеката на учителот“ книжевникот Ристо Лазаров истакнува: „Едно сум сигурен: уште од прочитот на првиот стих на поемава ‘Бденија Блажеви’ на Томислав Османли, силно ќе почувствувате дека таа е набабрена од животот што го живееме, од стварноста која секој ден нѐ мачи да ја издржиме и поднесеме. Соочени сме со стихови кои треба да се декламираат, на сет глас, со жар!…“. Поемата на Османли, македонскиот книжевен првенец не го чествува пригодно туку ангажирано, фокусирајќи ја, во вид на посланија до потомците, тревожната стварност на времето кое го живееме и остро осврнувајќи се на изневерите на питомите, благородни но и остри посланија оставени како аманети на Конески.

Објавата на поемата во која се чествува столетието на Конески, финансиски ја овозможи Комерцијална банка, а.д. – Скопје, инаку генерален спонзор на дел од активностите за одбележување на годината во која се заокружува првото столетие на Конески.

Книгата може да се купи во книжарниците „Или-или“, „Полица“ и „Литература.мк“ на ул. „Македонија“.

Книгата „Бдеења Блажеви“ е илустрирана со портретот на Конески од истакнатиот сликар Коле Манев. Тоа е портретот кој ги краси просторите на Друштвото на писателите на Македонија, чијшто прв претседател беше токму Блаже Конески.

Прва книжарница на тркала – Антолог со нов концепт на промовирање книжевни вредности

Издавачката куќа „Антолог“ од Скопје од денеска е побогата за уште една книжарница, но овој пат книжарница на тркала – сосема нов и иновативен концепт, кој ги подигна на друго ниво достапноста на книгите и културата на купување книги.

Новата, подвижна книжарница на „Антолог“ официјално ќе почне со работа денеска, со почеток во 12 часот, на Плоштадот Македонија, а потоа ќе ја менува својата локација низ целата држава, доближувајќи ги сите најактуелни наслови и автори дури и на најнеочекуваните места.

„Одамна размислувавме за можноста што повеќе да ги доближиме книгите до нашите читатели што секојдневно нè следат и нè поддржуваат, особено во оние места каде што за жал бројот на книжарниците и достапноста на книгите се на многу ниско ниво. Оваа нова и иновативна книжарница на тркала е следната приказна што ја испишуваме и на која сме особено горди. Атрактивната книжарница ќе патува низ целата земја за да биде што поблиску до книгољупците, задржувајќи го сепак оригиналниот уметнички концепт по кој како бренд сме препознатливи. Покрај богатиот асортиман на домашна и преводна литература за сите возрасти, идејата е и да прерасне во атракција што ќе обединува книжевни настани, промоции, средби и гостувања на автори“, велат од „Антолог“ и додаваат: „На нашиот сајт www.antolog.mk, како и на нашите профили на друштвените мрежи редовно ќе ги објавуваме програмата на книжарницата на тркала и локациите на кои таа може да се најде во моментот. Исто така, со оглед дека целта на оваа книжарница е да ги исполнува желбите на читателите – секојдневно ќе бидеме отворени за предлози на места што треба да ги посетиме следни.“

Во новата книжарница на тркала на „Антолог“ ќе бидат достапни огромен број наслови од поновата продукција на оваа издавачка куќа, а од денеска само во оваа книжарница ќе може да се набават и три најнови изданија, тукушто излезени од печатница: долгоочекуваната Умешноста да ја креирате вашата реалност на Ана Бучевиќ, новата книга Мечкоград од мегапопуларниот автор Фредрик Бакман, како и емотивниот роман Измиен грев од Сара Омар.

За време на првиот официјален работен ден на книжарницата на тркала на плоштадот во главниот град, сите книги ќе се продаваат по намалени цени, а организаторите најавуваат и голема наградна игра, како и гостување и потпишување книги на многу домашни автори, меѓу кои и годинашниот добитник на Роман на годината и кандидат за наградата „Балканика“, Владимир Јанковски.

„Бидејќи во животот секој ред е важен – со храбри нови зборови, да создаваме прекрасни нови светови!“, порачуваат од „Антолог“.

Деби албумот на Cut your nipple е достапен на сите дигитални платформи

По промоцијата на првиот сингл„What We Stand For”, победниците на Лузер Фест 2019 – Cut Your Nipple го издаваат својот прв студиски албум под етикетата на Пасворд Продакшн. „Тhe Jungle Book” се состои од 11 песни, кои жанровски се движат од панк, алтернативен рок до фанк, преку што се отсликува разноликоста и талентот на бендот.

Младиот демо бенд Cut Your Nipple е основан во 2018 година од страна на Марко Печеновиќ (бас и вокал), Павел Кузманоски (гитари) и Теодор Јаневски (тапани). Членовите на бендот се автори на музиката, а како продуцент се потпишува Дени Крстев од Студио 1060 – каде што изминатата година се снимаше албумот. “The Jungle Book” е издаден под етикетата на Пасворд Продакшн и едостапен за преслушување на сите поголеми дигитални музички платформи.

Бендот својот прв албум би го опишал како: „The Jungle Book е приказна за нас и нашата џунгла во која сме израснати заедно со животните кои се обидуваат да ни ја одземат иднината и кариерата, додека истовремено ни даваат огромна креативност. Деновите ни поминуваат со единствената мисла како да се преживее, а како единствени свесни суштества за своето постоење, навистина е лесно. Книгата е напишана едноставно и со прости детали кои нè возат низ природната мелодија на агресивниот оптимизам, како кога си на дивата страна од џунглата и се чувствуваш беспомошно, но опремен со добри мисли кои никогаш не те напуштаат. Интеграцијата на љубовта, гневот, слободата и болеста нè доведува до статус кво, а ние се обидуваме некако да мрднеме оттаму: процесот е секогаш бескрајна луда забава, која преоѓа во сè поголем апсурд. Животните што смрдат, урлаат, те гризат и постојат во тој вакуум простор, во нечистите воздух и вода, во отпадот, се дел од таа журка на која се забавуваме во ова дело. Можеби не е најдобрата книга што ќе ја прочитате, но дефинитивно е најдобрата книга што ќе ја слушнете.”

Cut Your Nipple настапија и на целодневната телевизиска културна програма на Таксират Фестивал наречена ПИН ТВ, хибридна верзија на ПИН конференцијата која традиционално се одржува во Скопје секој ноември. Се претставија со уникатно видео, изработено ексклузивно за целите на програмата на ПИН ТВ, а оваа селекција од нивната музика за прв пат можеа да ја чујат илјадниците гледачи и музички професионалци од целиот свет.

Од денес, The Jungle Book е достапен на поголемите дигитални музички платформи како Spotify, Apple Music, Amazon Music, Deezer, Tidal, а од утре (05.03.2021) ќе може да се преслушува и на Youtube.

извор: Пасворд продакшн

Cut Your Nipple го промовираат првиот сингл од деби албумот “The Jungle Book”

Cut Your Nipple гопромовираат првиот сингл од деби албумот “The Jungle Book”

Победниците на Лузер Фест 2019, Cut Your Nipple, денес го промовираат својот прв сингл “What we stand for” од деби албумот “The Jungle Book”

Повеќе од една декада, Лузер Фест е единствениот настан посветен на промоција на најмладите, демо артисти и музички изведувачи од сите жанрови на домашната сцена.

Најдругарскиот настан во склоп на Таксират Фестивал, секоја година ја насочува својата енергија да им помогне на младите и талентирани изведувачи да ја изградат својата музичка кариера.

Победниците на Лузер Фест 2019, Cut Your Nipple се “Phunk” (панк, фанк, алтернативен, рок) бенд од Тетово, основан во 2018 година од страна на Марко Печеновиќ (бас и вокал), Павел Кузманоски (гитари) и Теодор Јаневски (тапани).

По победата на Лузер Фест, настапот на Д Фестивал и ПИН музичката конференција и шоукејс фестивал, на почетокот на 2020-та, го снимија својот деби албум – “The Jungle Book” во студио 1060. Албумот ќе биде издаден од страна на Пасворд Продакшн и на 4-ти март ќе биде достапен на сите дигитални платформи.

“The Jungle Book” е прво албумско дигитално издание овозможено од соработката на Пасворд Продакшн со Believe Digital, кои се водечки дигитални дистрибутери за независни изведувачи и продукциски куќи. Албумот ќе биде дел од поголем каталог на домашни, квалитетни музички изведувачи.

извор: Пасворд Продакшн

„Taftalidze Shuffle“ – нов албум на Влатко Стефановски во издание на „Croatia Records“

Новиот албум на гитаристот Влатко Стефановски „Taftalidze Shuffle“, со кој ја продолжува соработката со дискографска куќа „Croatia Records“, ќе биде објавен утре, 20 -ти ноември. На новиот албум Влатко Стефановски е придружуван од подмладеното Трио. Во нова ритам секција членуваат басистот Иван Кукиќ, како и неговиот син Јан Стефановски на тапани.

Како што соопшти „Croatia Records Македонија“, и овој албум, како и сите соло-проекти на Стефановски, Влатко му го има посветено на својот град, нашето единствено Скопје, населбата Тафталиџе, која е неговото маало… Затоа песните се интимни и лични, а повторно толку блиски секому, заради сензибилитетот кој го носи музиката на Влатко Стефановски.

Албумот „Taftalidze Shuffle“ е создаван во периодот од јануари до октомври 2020-та, а текстовите се пишувани од април до јуни оваа година.

– Наместо да гледам ТВ и да паѓам во депресија, се одлучив да правам музика. И многу сум задоволен од резултатот, изјави Влатко Стефановски, зборувајќи за својот креативен процес.

Албумот е сниман во домашното студио на Влатко – „Езотерија“, додека миксот и мастерингот се работени во студиото „Тра ла ла“ на Мите Димовски. На албумот има и многубројни гости. Најбројни се клавијатуристите: Дамир Имери, Кирил Џајковски, Диран Тавитјан, Тихомир Поп Асановиќ, Матија Дедиќ и Васил Хаџиманов. Придружните вокали се на Андријана Јаневска, додека познатиот кавалџија Теодосиј Спасов во една песна свири труба. Меѓу гостите на албумот е и актерот Никола Ристановски, кој во песната „Дијаспора“ има мал речитатив. Дизајнот на обвивката е дело на уметникот Ладислав Цветовски.

„Taftalidze Shuffle“ претставува извонредна колекција на вокални и инструментални теми на Влатко, низ кои бојата на неговата гитара е нешто што вечно останува во меморија на слушателот. Албумот содржи девет теми: Taftalidze Shuffle, Funky junkie, Игранка, Гаража, Global Warming – local freezing, Огледало, Немам песна за тебе, Раскрсница, Дијаспора.

Освен на компакт-диск, „Taftalidze Shuffle“ на Влатко Стефановски кон крајот на декември „Croatia Records“ ќе го објави и на винил. мд/сп/

извор: МИА

Изложба на плакати од 13. Скопје постер фестивал

Во Младинскиот културен центар (долна галерија) од денеска до 26 ноември ќе биде поставена изложба на плакати од 13. Скопје постер фестивал, чија тема годинава е КОВИД-19.Организаторот – Здружението Плакарт соопшти дека е меѓу организаторите потткнувачи на создавањето глобална мрежа на дизајн-асоцијации и здруженија со цел да инспирираат движење за поддршка во борбата со пандемијата предизвикана од КОВИД-19 и сите предизвици поврзани со неа.

Ќе бидат изложени плакати од 75 светски дизајнери од 56 земји, вклучително и од нашата. Исто така, ќе бидат претставени и плакати на студенти кои се приклучија на повикот на нашата иницијатива со цел да се придонесе во ширењето на мисијата и гласот на уметникот во справувањето со КОВИД-19.Иницијативата се реализира во сорбаотка со „Poster Тerritory” од Калифорнија, Чешката асоцијација за графички дизајн, Московското биенале и реномираниот дизајнер Мирко Илиќ од Њујорк – познат како еден од најинспиративните дизајнери и стрип-уметници од поранешна Југославија.Дел од дизајнерите кои ќе бидат застапени се: Јоси Лемел (Израел), Мирко Илиќ (Љу Јорк), Хавиер Борбола (Куба), Адек Сапутра (Индонезија), Петре Поч (Унгарија), Тирсо Цезар (Италија), Кристофер Скот (Еквадор), Луис Ривера (Бразил), Ерин Брајт (САД), Роберт Јанг (Велика Британија), Небојша Гелевски и Лазе Трипков (Македонија), Хитоши Мјура (Јапонија)…Плакарт информира дека ќе нема посебен термин за отворање на изложбата денеска, а сите заинтересирани може да ја посетат до 26-ти месецов, секој ден од 10 до 20 часот, согласно со здравствените протоколи за јавни настани

извор:МИА

“Огледало” – Првата песна од новиот албум на Влатко Стефановски

„Огледало“ – Првата песна од новиот албум на Влатко Стефановски

Во услови и време кои се повеќе не притискаат да се затвориме, чепкањето по старите долапи е уживање кое освежува спомени и не втурнуваат кон пловидби низ себе си, ослободувајќи ги сите сетила и отворајќи нови погледи кои пак раѓаат фантастични дела.

„Огледало“ е една од драгоценостите кои Влатко Стефановски ја исчисти од заборав и ја постави како една од деветте песни на неговиот нов албум.

Истата денес е веќе во етер и може да се проследи на следниов линк: (https://www.youtube.com/watch?v=f21lVGtLaas)

Насловот на албумот е Taftalidze shuffle, веројатно како синоним за бескрајните шетања по улиците на Тафталиџе, оние низ кои е потрошен значаен дел од животот, оние кои креирале приказни што не се затворат туку напротив, се заокружуваат со отворање на нови и поубави.

Албумот е снимен во студиото Езотерија, а автор на сите 9 песни е Влатко Стефановски. Како гости на албумот се појавуваат неговиот син Јан Стефановски и Иван Кукиќ.

Во очекување на промоцијата на целиот албум која е планирана за крајот на месецов, длабоко се поклонуваме и уживаме во прекрасна музика.

автор:Бон&Бона