Аудиокултура

Tag.

“Live at Audiokultura” со Unleashed cooperation од Полска

“Live at Audiokultura” со Unleashed cooperation од Полска

Саботата која измина, во Аудиокултура, полскиот бенд Unleashed cooperation, преку изведба во живо на авторска музика приреди вистинско уживање за сите посетители.

Спојот на одличните џез композиции и врвниот звук од системите на Teoharov audio, секогаш чинат вистинска магија преку која апсорпцијата на музиката и нејзиното доживување добиваат една сосема поинаква димензија. Едночасовното извонредно музицирање опфати композиции од нивниот прв албум низ кој се проткаени мисли, инспирации, чувства, силна поврзаност, соработка, соживот и интеракција за кои веруваат дека се алатки преку кои може да се промени светот на подобро.

Саботно џез матине во Аудиокултура со студенти од Музичката академија во Штип

Саботно џез матине во Аудиокултура со студенти од Музичката академија во Штип

Да се следи настап во живо на млади музичари е неверојатно искуство кое вдахнува емоција на возбуда … и надеж дека оваа младина ќе има сила и истрајност до недоглед да трага, истражува, учи и покажува како се живее музичка култура.

Беше задоволство да се ужива во едночасовниот репертоар отсвирен со младешки ентузијазам и врвна спремност кои ги покажаа талентираните студенти изминатата сабота во Аудиокултура.

Сосема заслужено овие млади студенти се првите кои ја добиле можноста преку „Studenst play music at Audiokultura“ да ги искусат сите привилегии кои ги нуди Аудиокултура како музичка сцена и во своето портфолио како основа за надградување да го впишат искуството да се музицира пред публика со префинет вкус и аудиофили со високи музички и звучни познавања.

Овој настан беше првиот од 5-те предвидени како дел од „Live at Audiokultura“ преку кој Аудиокултура во континуитет поттикнува афирмација на музиката, музичарите и придобивките од нивна достапност како основа за социо-културно живеење.

Следниот настап на бенд креиран од студенти на Музичката академија при универзитетот Гоце Делчев од Штип ќе биде последната сабота од месец април.

Free Jazz во Аудиокултура

Free Jazz во Аудиокултура

Фантастични џез ритми креирани по моментална инспираци на триото Поповски, Китановски и Јосифовски е музиката која доминираше на вчерашниот “Live at Audiokultura” настан со кој Аудиокултура и Комерцијална банка како Генерален покровител ја продолжуваат низата од настани преку кои промовираат квалитетна музичка култура, истата правејќи ја достапна за широка публика.

Препознатливата индивидуалност на овие извонредни музичари, нивното долгогодишно познавање и заедничкото музицирање беа пренесени во музичка формација која го заслуши целото внимание на публиката. Атмосферата креирана од импресива тишина, фокусирано слушање и долг аплауз после секоја завршена композиција говореше дека оваа вечер е многу повеќе од само музички настан. Достојната размена на софистицираност, култура, почитување, музичка и звучна исклучителност на кои сведочевме вчеравечер, се пример кој треба да се следи.

Вечерта на одлична музика беше надополнета со кратка презентација од страна на Винарија Камник (Chateau Kamnik Winery) кои ја објаснија поврзаноста на вкусот на виното со чашите од кои се консумира.

Крај Вардарот сесии со Аудиокултура и Божиновски, овој петок во МКЦ

Крај Вардарот сесии со Аудиокултура и Божиновски, овој петок во МКЦ

Крај Вардарот Сесии е заеднички проект на дискографската куќа ПМГЏез и концептуалниот соничен кафе бар Аудиокултура, кој се реализира во соработка со реномираниот македонски бренд за часовници и ексклузивен накит, Божиновски.

Проектот трае веќе неколку месеци, а се состои од реализација на десетина концерти кои ПМГЏез, како реномирана дискографска куќа, ги организира во извонредно атрактивниот и звучно врвно подготвен објект на Аудиокултура. Сите настапи се снимаат, а селекција од најквалитетните мигови ќе се најде на винил издание, кое треба да се појави оваа есен и ќе биде своевиден артефакт од оваа интересна колаборација.

Овој петок, на 19ти мај, Крај Вардарот Сесии за миг ќе излезе од кафе барот на Аудиокултура, всушност, заедно со нивниот звук и атмосфера ќе бидат пренесени во горното фоаје на киното Фросина, при МКЦ Скопје.

Во рамките на четвртото издание на Крај Вардарот Џез Фестивал, ПМГЏез, заедно со Аудиокултура и Божиновски, ќе приредат специјална фестивалска вечер во која проектот Крај Вардарот сесии ќе биде претставен на пошироката јавност на еден малку поинаков начин.

Покрај неколкуте обраќања на темата од организаторите, аудио претставување на материјалот кој ќе се најде на плочата и мал винил базар, посетителите ќе имаат уникатна можност да проследат изложба на фотографии направени во рамките на досегашните настапи од овој проект во Аудиокултура.

Секој од коорганизаторите ќе има свој штанд каде ќе ја претстави својата работа и производи, а вечерта ќе ја крунисаат два концертни настапи, промоции на ноедамна излезени домашни албуми во продукција на ПМГЏез, кој се јавува како организатор на Крај Вардарот Џез Фестивал.

Настанот започнува во 19 часот, влезот ќе биде слободен, а публиката ќе може да ужива во концертите на две уникатни дуа: Букршлиев – Томевски и Кондовски – Дробицки. Ова е извонредна можност да се запознаете поблиску со работата на некои од најактивните културни и дизајн чинители на сцената во последниве години, па повелете.

“Live at Audiokultura” со Добрила и Дориан Дуо

“Live at Audiokultura” со Добрила и Дориан Дуо

Програмата од музички настани кои се реализираат во Аудиокултура е навистина богата, различна и непогрешливо квалитетна. Одржливото, па и растечко ниво на музички, звуковен и организациски квалитет кои се пласираат оттука се респектабилен фактор за кој публиката цврсто се држи. Се чини дека секој кој еднаш посетил настан, оттука излегува со нескротлива желба да присуствува на сите следни.

Доказ за тоа е настанот кој овој петок се реализираше во Аудиокултура. Интензивниот дожд очигледно не успеа никого да спречи во намерата да дојде тука и да си дари себе си нова доза од извонредна музика. Овој пат во изведба на Добрила и Доријан Дуо.

Неверојатно позитивна енергија, отвореност, воодушевување, ведрина и добар збор се излеаја од Добрила на самиот старт на настанот. Ја разоружа публиката од сите бариери, прецизно и смело нагласувајќи дека во просторот кој сите го чувствуваме како дом, музиката е обединувач на, како што самата ги нарече, сладокусци кои точно знаат што значи музиката да се слуша репродуцирана преку hi-end системите од teoharov audio. Достојно и со почит, кон музиката, звукот и публиката, Добрила и Доријан приредија извонредно музичко патување на кое доминираше интерпретаторска и емотивна раскош. Композициите од нивните два албуми, претставени на овој автентичен начин, не насочија кон сосема поинакво доживување на музиката која на сите ни е добро позната.

„Помеѓу два тона“ беше музичко патување кое обедини различни временски периоди на привлечен начин. Музиката од минатото, во емотивна и игрива изведба на Добрила и Доријан, сосема и приличи и на сегашноста. Сладокусците кои имаа можност тоа да го доживеат, уште долго ќе ја паметат оваа вечер како совршена.

Елементал: Добрила, беше вистинско задоволство да се следи Вашиот настап во Аудиокултура. Воодушевувачка е Вашата потенцирана отвореност за неограничена размена на енергија со публиката. И тоа од самиот почеток на настапот. Што е тоа што го трга штитот или поблаго речено неопходното запознавачко интро кое вообичаено е пресудно за насоката во која ќе тече настапот?

Добрила: Почетокот, темата, зачетокот, иницијацијата… тоа е секогаш најважно, зар не? Тоа е местото од каде што почнува приказната и трасата по која ќе се движат работите. И доколку на тој момент не му се даде најдобрата насока, крајот секако нема да биде таков каков што сме го  посакувале. Јас, искрено, многу се радувам што сте го забележале начинот со кој јас го започнав концертот во Аудиокултура. Зачуденоста е уште поголема поради тоа што досега никогаш не сум изоставила да го започнам концертот или да зборувам помеѓу песните, но ете вие сте први што јавно го откривте тоа 😊. И сега, кога ме проѕревте, еве да си кажам: таквите почетоци се обид да се создаде непосреден однос помеѓу артистот и публиката. Да се отвори канал преку кој емоцијата ќе тече, ќе се разлева низ околината во кој на некој чудесен начин сите ќе бидат учесници во тоа. А најлесниот начин да се создаде тоа е со хумор, забелешка, смешка. Музиката за мене е чин на размена на емоции и тоа преку раскажување приказни, преку покажување што чувствувам јас кога раскажувам и мојата желба да им ја пренесам таа емоција на луѓето околу мене. А приказни не се раскажуваат секому, туку само на оние на кои им верувате, на оној кој ви е близок, со кој си се сакате. Приказната има сопствени правила и децибели со кои се соопштува – никогаш гласно, ами со шепот и во доверба. Е, за да се создаде таква блискост, артистот мора да се погрижи да направи публиката да му верува и да се почувствува како драг пријател. На тој начин се рушат сите бариери и започнува размената на чистата емоција. А кога тоа ќе се случи, тогаш бидете сигурни дека ќе имате одличен концерт.  

Елементал: Какви Вашите впечатоци? Љубопитна сум за деталното доживување од другата страна на приказната и деталите кои за Вас како музичар се важни

Добрила: Јас обожавам камерни концерти. Обожавам! Сакам кога публиката е блиску, кога можам да ги слушнам како дишат или не дишат 😊, кога стануваат дел од песната. Тогаш блискоста за која зборував, станува уште поголема и полесно се стигнува до секој во салата. Таков беше концертот во петокот за кој мора да откријам една тајна: на нашата тонска проба кога го местевме звукот со Дориан и Веселин (Аудиокултура), на мојата прва проба на микрофонот, а подоцна и заедно со утот на Дориан, јас останав занемена! Едноставно, ме заплиска таков звук поради кој не знаев каде сум. Како првпат да се слушам себеси, да се откривам на некое друго место. Поради таквото мое „непрепознавање“ мислев дека некаде во пеењето грешам  и постојано му повторував на Дориан да пробаме уште еднаш и уште еднаш. Но кога публиката почна да влегува и да ги покажува очекувањата од тоа што ќе го чујат, знаев дека пред нас е ноќ во која имаме можност да ја озвучиме тишината… И одеднаш сѐ ми стана јасно. Ги поздравив, се насмеавме и започна волшепство во кое сите заедно се стопивме.

„Крај Вардарот сесии со Аудиокултура“ во МКЦ

„Крај Вардарот сесии со Аудиокултура“ во МКЦ

Културниот билтен на настани, на 19 мај, бележи целодневен концепт насловен „Крај Вардарот сесии со Аудиокултура“.

Имено, долгорочниот проект „Крај Вардарот сесии“ во Аудиокултура, на 19 мај ќе го реализира осмиот настан од вкупно предвидените 11. Овој пат во МКЦ, преку целодневна програма која преку неколку различни настани ќе ја долови суштината на проектот чија крајна цел е креирање на материјали со кои ќе се збогати не само македонската музичка архива, туку и мемоарите на општествената културна историја.

Проектот од самиот старт беше најавен како концепт кој, преку настапи во живо на истакнати музички имиња, ќе ја надмине основната форма на промоција на квалитетна музика, нудејќи и на публиката уникатни искуства преку низа специфичности својствени за Аудиокултура која одамна е предводник во поставувањето на нови музички, звучни и културно општествени стандарди. До сега, во Аудиокултура се реализирани вкупно 7 настани на кои свои настапи во живо имаа истакнати музички имиња. Од секој од овие настани, реализирани во совршени акустични услови и звучно репродуцирани преку врвните hi-end системи од teoharov audio, е документиран аудиоматеријал од кој на крајот на 2023 година ќе биде издаден винил запис. Осмиот настан од овој концепт ќе има своја проширена варијанта за која Аудиокултура во заедничко партнерство со Божиновски часовници и накит, Теохаров аудио и ПМГ Рекордингс, креираа целодневна програма од тематски настани кои ќе се реализираат во рамки на официјалната програма од четвртото издание на фестивалот „Крај Вардатот Џез“

Реализацијата на истата ќе започне во 19:00 со изложбата на фотографии од Татјана Ранташа, Стефан Рајхл и Благоја Ангеловски. Во оваа прилика ќе бидат изложени дел од фотографите настанати за време на претходните 7 настани од концептот „Крај Вардарот сесии“ во Аудиокултура. Изложбата ќе биде проследена со музика снимена во живо од настаните “Крај Вардарот Сесии” во Аудиокултура, пренесена преку системите од Теохаров аудио. Поставката од фотографии ќе биде изложена во холот на МКЦ до завршување на последниот настан од предвидената програма.

Музичката доминација ќе продолжи во 20:30 часот за кога е закажан настапот во живо на дуетите Букршлиев – Томевски и Кондовски – Дробицки. За изведба на Букршлиев – Томевски се својствени слободна и дискретно структурирана импровизација на нетипични камерни формации. Во оваа прилика, својата уиграност и развиената телепатска вештина за музичка комуникација ќе ја покажат преку промоција на албумот „Something Lonely in the Bone“ во издание на ПМГ Џез.

Пред стартот на последниот настан од овој концепциски, музичко-уметнички ден, Аудиокултура и Божиновски часовници и накит, под чие заедничко партнерство ќе биде издаден винилот „Најдоброто од лрај Вардарот сесии во Аудиокултура“, ќе споделат значајни детали за истиот. Имено, ќе стане збор за деталите на оваа уникатна приказна која обединувачката моќ на музиката ќе ја пренесе, не само преку музиката како таква, туку и преку форматот, дизајнот, бројот на примероци и локации на кои ќе може да се купи ова извонредно парче музика.

Целодневната културна авантура ќе биде заокружена со настап во живо на дуетот Кондовски – Дробицки. Нивната соработка е документирана низ неколку изданија, делумно испланирано, делумно импровизирани, но секако непогрешливо квалитетни.

Она што е особено важно се високите организациски стандарди и промоцијата на врвниот звук својствени за Аудиокултура. Во оваа прилика, специјално за оваа целодневна програма, во МКЦ ќе биде поставен сетап од hi-end системи од teoharov audio преку кој ќе се реализира звучната репродукција на сите тематски настани. Со цел доближување на ова можност за уникатно доживување на музиката и врвниот звук од што поголем број на публика, влезот за настаните ќе биде слободен

Камерна класика во Аудиокултура

Камерна класика во Аудиокултура

Аудиокултура ја продолжува својата мисија на безрезервен музички поддржувач, промотор на врвен звук и прибежиште од суровата општествено социјална темнина. Вистински културен светилник и поле на кое пулсира задоволство од исполнување на визии и желби кои до скоро се чинеа само луди замисли за кои нема кој да создаде тло врз кое ќе се развиваат, растат и остваруваат.

Аудио бар, уметност попишана од врвни сликари и дизајнери, импресивна понуда на винили од светски познати издавачки куќи и аудиоопрема од која застанува здив. Ете тоа е Аудиокултура која широко отвора врати за истакнати музички имиња, ентузијасти кои штотуку тргнале кон освојување на музичкиот и звуковен свет, но и со оние кои ја доловиле суштината на овој дом и дошле да ја впијат сета таа енергија, пасија и визија од кои е креирана Аудиокултура.

Петокот кој измина се реализираше уште еден настан од проектот „Live at Audiokultura“ (50 guests limited), на кој свој настап во живо реализираше Квартетот во состав Ерхан Шукри – виолина, Гоце Вангеловски – виолина, Аспарух Коневски – виола и Зоран Павловски – контрабас.

Одлична камерна изведба на безвременски класични композиции, врвна звучна репродукција и пријатна атмосфера се впечатоците кои ја одбележаа оваа вечер. Апсолутната тишина во која се проследи настапот на овој квартет беше еднакво моќна како и долгите аплаузи кои следеа после секоја завршена нумера. За секоја почит. Однос кој годи и облагородува, импресионира и инспирира.

После 45 минутно уживање во музика, разговорот со музичарите беше природен продолжеок на вечерта.

Елементал: Вчеравечер во Аудиокултура имавте импресивен настап. Беше вистинско задоволство да се биде публика на камерно оркестрирање од музичари кои ја нашле совршената мера за класичната музика соодветно да и приличи и на сегашноста, но и на амбиентот и публиката.

Какви се Вашите впечатоци од вчерашниот настап?

Ерхан: Најпрво да се заблагодарам за понуденото интервју. Ми причинува посебно задоволство да ги споделам моите впечатоци од настапот во Аудиокултура.

Со самиот амбиент во Аудиокултура, уште при самиот влез, со првиот направен чекор веќе добивате впечаток дека се работи за еден суптилен и префинет простор во кој не можете да останете рамнодушни и да не посакате да музицирате.

За сите нас беше прекрасно доживување бидејќи одамна не сме имале прилика за ваков интимен концертен настап.

Имате чувство дека сте во домашен простор, а всушност сте на концертен подиум и пред публика која со сите сетила е вперена кон вас.

Тоа ни даде дополнителна мотивација за да музицираме со поголема посветеност и предаденост. Публиката пријатно не изненади поздравувајќи не со топол аплауз после секоја композиција.

Впечатоците се многу силни и веќе размислуваме во иднина почесто вака да настапиме.

Елементал: Што значи за Вас како музичар да се настапува во место кое е синоним за врвен квалитет кога се во прашање музиката и звукот, а истовремено тоа е и сцена која, штом веќе го прифатила Вашиот настап, ја нуди сета слобода за изразување и импровизации?

Ерхан: Бев пријатно изненаден кога ја добив поканата од Аудиокултура да настапиме со нашиот гудачки квартет. Од срце прифатив.

Овој концепт на Аудиокултура несомнено е современо глобален и е за поздравување бидејќи тој концепт е секогаш ренесансен, неповторлив и автентичен.

Аудиото како феномен, сам по себе е простор кој нуди многу можности со кои може да се изразат повеќе експресии и да се презентираат различни особености. Во создавањето на звукот врвниот квалитет треба да се бара во убавината на бојата и јасноста на тонот, диференцијација и препознатливост на различностите на самиот звук, а сепак како краен производ треба да се има компактноста и целината за да се формира целосната слика на звукот. Аудиокултура како простор тоа ни го овозможи како репродуктивни музичари.

Затоа, знаејќи дека во тој шармантен простор настапуваат врвни музичари, поканата за настап беше предизвик кој го сфативме сериозно и дадовме максимум за да ја оправдаме дадената прилика да бидеме на сцена каде веќе еманира прекрасна енергија од настапот на претходните врвни музичари.

Елементал: Што е она што Ве води на настапите: утврдениот репертоар, публиката, личното расположение или нешто сосема друго?

Ерхан: Покрај квартетот како гудачка формација, исто така работам со гудачки камерен оркестар и мандолински оркестар, а водено сум и професор по виолина и камерна музика во ДМБУЦ „Илија Николовски-Луј“.

Земајќи предвид дека сите се различни структури и формации, нормално е да се размислува и за различни концепции на репертоар кој ќе биде избран за различна публика, различна пригода и се разбира адаптирајќи се на побараното од вас.

Во зависност од концертите и настапите за мене е интересно и предизвик секогаш да се има различен репертоар со нови композиции. Се застапуваат сите жанрови, сите стилови од гранките на музиката.

Се разбира дека првичното лично расположение во изборот на репертоарот е пресудно, но сепак во функција да биде задоволен вкусот на публиката.

За ова претставување на квартетот, Аудиокултура побараа тематиката да биде со класичен призвук. Самиот наслов Калсика ВС Класика беше спој на популарни класични теми од композитори кои оставиле прекрасни музички дела како во оперската, балетската и симфониската музика, така и во филмската и популарната музика од нашето секојдневие. Овој направен колаж е со епски препознатливи теми за сечие уво и сечиј вкус.

Елементал: Несомнено е дека Вас ентузијазмот и ведрината Ви се верни сопатници. Но, тоа никако не Ве оттргнува од раскошна формалност и строга внесеност во музиката и комуникацијата со оние со кои настапувате. Синхронизирани до перфекција звучите како еден. Што е она што може да Ве инспирира да излезете од рамката на сигурна зона и да си дозволите инцидентна креатива на самиот настап?

Ерхан: Изведувањето на самите композиции избрани од големото светско музичко наследство не нудеа простор за импровизации и видоизменување на нотниот текст. Но затоа пак, останатите жанровски теми од филмската и популарната музика понудија сопствени аранжмани кои ги имам направено по лична инспирација и имагинација, потполно почитувајќи го креативниот импулс кој ќе дозволи слобода во интерпретацијата.

Со квартетот кој го сочинуваме јас и моите драги колеги (Гоце, Арчи, Зоки), долги години сме поминале заедно во оркестарот на НОБ. Тоа е клучот на разбирањето и одличната комуникација, тоа е она што не прави синхронизиран тим. Другарувањето со нив многу ми значи, но професионалниот однос во музицирањето е задолжителен. Само повратната информација на одговорност, која секој од нас ја има, носи кон сплотеност во музицирањето.

А детскиот ентузијазам, ведрината и насмевката?

Тоа е ми е непроценливо наследство, тие се дел од мене и без нив ништо не би постигнал. Си ги почитувам и негувам бидејќи тие ми се дадени од Изворот.

“Audio comparation” – нов концепт од Теохаров и Аудиокултура

“Audio comparation” – нов концепт од Теохаров и Аудиокултура

Креирајќи ја Аудиокултура, Теохаров суптилно ја сподели својата пасија кон музиката и квалитетниот звук, посветено залагајќи се истата да стане непресушно креативен извор кон кој ќе пристапат што поголем број на луѓе кои ја делат истата страст.

Мисијата е повеќе од успешна.

Аудиокултура веќе не е само промотор, креатор и градител на здрава култура. Со идеи, но и со работа, со посветеност и истрајност, Аудиокултура идејно и посветено води моќно културно движење кое веќе е широко препознатливо по низа специфичности, врвен квалитет, уникатност и неодолива привлечност.

Предводнички и визионерски, кон звуковно и музичко облагодорување, Аудиокултура го најави „Audio comparation”- нов долгорочен концепт кој ќе започне да се реализира од утре, 14.03.2023 година.

„Audio comparation” се музички работилници од отворен карактер на кои посетителите ќе имаат можност за истражување и компаративно анализирање на перформансите од сетапот на месецот кој Аудиокултура ќе го најави непосредно пред работилницата.

Целта на работилниците е потенцирање на можноста за индивидуални или групни презентации на кои посетителите, преку одлична музика, ќе имаат можност одблиску да се запознаат со детали за hi-end аудио опремата и спецификите на звукот кој го репродуцираат. Како крајна цел, личното искуство е одлична можност за уникатно доживување на музиката, селектирање, подредување и категоризирање на нијансите од кои се креираат индивидуалните преференците и склоности кон одреден тип на Hi-End аудио опрема.

На утрешната работилница која започнува во 18 часот, посетителите ќе имаат можност за директна споредба на Teoharov C-type loudspeaker I и Focal Kanta 1.

Како извор на звук и засилувач ќе се користи новиот продукт од teoharov audio – NetAmplifier.

Текст: Бон&Бона

Совршена музичка игра на Марија Димитриевиќ Квартет во Аудиокултура

Совршена музичка игра на Марија Димитриевиќ Квартет во Аудиокултура

Појавувањето на Аудиокултура во Скопје одамна не е ново, но сè уште е свеж и храбар исчекор кој не само на Скопје, туку и на Македонија и го надополни недостатокот од ентузијазам и истрајност во пласирање на бескомпромисен квалитет кога е во прашање музиката и квалитетниот звук.

Воодушевувачки чиста е енергијата која ве пречекува во Аудиокултура. Како да влегувате во паралелен универзум кој во потполност ве растоварува од се. Поле на апсолутен мир, лежерност, отвореност за размена на човечки, музички и уметнички енергии кои лесно ве заведуваат непрестајно да сакате да престојувате во домот во кој доминира неграничено количество од почит кон уметноста, музиката, уметниците и оние кои дошле себе си да се дарат со привилегијата баш тука да пијат од мешавината која го чини еликсирот на животот.

На 09 март, Марија Димитриевиќ Квартет го прошири списокот на оние кои во Аудиокултура, себеси и на публиката и го приуштиле можеби најдобриот настап кој некогаш го имале.

Во рамки на концептот „Live at Audiokultura“ (50 guest limited), Марија Димитриевиќ – вокал, Гордан Спасовски – пијано, Кирил Туфекџиевски – контрабас и Виктор Филиповски на тапани, воодушевија со својот импресивен настап и изведба на низа од меки џез композиции и соло инструментални делници. Беспрекорниот звук од системите на teoharov audio ја надополни сета музичка раскош, суптилно завлекувајќи не во кругот на оправдано пребирливи и со високи поставени критериуми кога се во прашање музиката и квалитетниот звук.

Со нескриена внесеност, воодушевеност и спонтаност, овој кавртет наметна чиста радост … лесно прифатлива како детска игра.

Текст: Бон&Бона