Нема да биде крај на светот

Претставата ,,Нема да биде крај на светот” со две интернационални награди

Дарја Ризова повторно најдобра регионална актерка – овој пат на Фестивалот на актерот во Коњиц – БиХ 

На деветтиот  Фестивал на актерот во Коњиц/ Festival Glumca BiH на кој учествуваа девет професионални театри од регионот: Србија, Хрватска, РС Македонија и БиХ, нашата актерка Дарја Ризова ја доби наградата за најдобра регионална актерка за улогата на Маша во претставата „Нема да биде крај на светот“ по текст на Аднан Лугониќ, а во режија на Нина Николиќ. Како што истакна и директорот на фестивалот, Бенјамин Мушиновиќ, радува фактот што оваа награда како жири-комисија ја доделува самата публика. За разлика од другите театарски фестивали, жирито на овој фестивал го сочинува само публиката која го избира најдобриот актер и актерка. За театарските работници тоа е најчесното. Фестивалската програма завршува со прогласување на најдобра актерка и најдобар актер на 15 јуни 2022 година. 

А пак  на фестивалот БиХ драма Зеница -БиХ ,,Нема да биде крај на светот” е прогласена за најдобра претстава во целина . 

Копродукцискиот проект помеѓу МНТ, Перипетија продукција и Сараевски ратни театар САРТР, „Нема да биде крај на светот“ е добитник на наградата од новинарското жири за најдобра претстава во целина на фестивалот БиХ драма Зеница -БиХ

Следната изведба е закажана на 22 јуни во 20:30 на сцента во МНТ, а во рамките на Скопско лето.

Светот во еден момент навистина застана – Џана Џаниќ

Утревечер во ,,Македонскиот Народен Театар “претставата  ,,Нема да биде крај на светот “ во режија на Нина Николиќ премиерно ќе се игра пред Скопската публика во рамките на фестивалот МОТ . 

Светот каков што го познававме во еден момент навистина застана, но не исчезна. Бидејќи премиерата е веќе распродадена ,следните изведби се закажани за 23,24,25 и 26ти Декември .Билетите се достапни онлајн  на веб страницата на МНТ 

По тој повод овој пат разговараме со Џана Џаниќ – Актер во Сараевски ратни театар -САРТР 

Џана здраво и добре ни дојде во елементал 🙂 

Се надевам дека малку стивнаа импресиите после успешната премиера во Сараево на претставата ,,Нема да биде крај на светот” во режија на Нина Николиќ и сега веќе се спремате за нови впечатоци , задоволства и импресии од Скопската публика 🙂 Ова е претстава која воедно е копродикциски проект со Македонскиот Народен Театар каде што оваа среда ја играте македонската премиера на еден од значајните фестивали кај нас – МОТ . 

Интересниот податок за вас е тоа дека секоја улога всушност ја добивате на кастинг , тоа сигуно ви причинува не само големо задоволство туку и признание дека сте таму каде што припаѓате . Па така и оваа улога ја добивате токму на овој начин и со истата добивате за кратко време специјална награда за актерска игра на Театарскиот фестивал ,,Живи Фест “во Восна и Херцеговина . 

Елементал: Раскажете ни малку за овој процес ?  Некоја случка можеби низ процесот на работа ? 🙂 

Џана: Ова е моја трета соработка со Нина Николиќ. Точно е дека се запознавме на аудицијата за претставата „Буре барут“ на која таа ме одбра. Другите соработки се последица на тој прв заеднички процес. Концептот на аудиции ми беше близок уште во студентските денови, не ми претставуваше проблем да отпатувам дури и во некоја од соседните земји на аудиција. Сметам дека тоа е важен актерски тренинг.

МНТ го доживувам како пријателски театар и полека станува мое сигурно место, првенствено поради луѓето со кои соработувам, а делумно и затоа што сакам да мислам дека моето срце е македонско. 😊 Се радувам што ќе настапуваме на МОТ. 

Овој процес настана од вистинска потреба за театар. Ние сме мала екипа која сака да работи заедно, едногласно го одбравме текстот, читачките проби ги направивме преку зум, а август го поминавме на малата сцена на МНТ. Температурите дивееја, надминуваа +44 степени и навистина имав чувство дека се случува крајот на светот кога ќе ја отворев вратата од театарот и врелиот ветер ми го распаруваше лицето. Она што би го издвоила, кога е во прашање работата со Нина, е темелниот благонаклонет пристап во читањето на текстот. Ја анализиравме секоја мисла со длабока верба во напишаното, ослободени од било какво предзнаење и му препуштивме на текстот тој да не‘ води.

Елементал: Што е она кое за вас беше клучна водилка да ја создадете оваа улога во време каде што светот за миг навистина запре ? 

Џана: Точно е дека овој процес се случи во време на пандемија, но тоа немаше значително влијание на мојата работа на улогата. Светот каков што го познававме во еден момент навистина застана, но не исчезна. За да опстанеме, едноставно моравме да се прилагодиме на новонастанатата ситуација. Улогата на Нина во оваа претстава ме опоменува за важноста да се преземе одговорност за сопствениот живот. Таа му се опира на менталитетот на жртвите со кои сме опкружени, верува во можноста за промени и присвојување на нови механизми на размислување. Можеме да научиме да го живееме животот поинаку.

Елементал: Имате работено со големи театарски имиња како што се Харис Пашовиќ , играте рамо до рамо со Раде Шербеџија и многу други значајни имиња во театарскиот свет . Од секој од нив сигурно имате научено нов метод , пристап , естетика ….Но она што е важно е како вие  успевате да се борите за вашиот свет и индетитет како актер? 

Џана: Се придржувам кон театарската етика. На време доаѓам на пробите, приватното го оставам надвор од сцената, ги почитувам сите учесници во процесот на создавање, верувам во институцијата ансамбл, во важноста да се раскажуваат приказни, се трудам да ја задржам индивидуалноста, но и да ги слушам другите. Одговорно се однесувам кон својот позив.

Елементал: Кога светот заедно со театарот може навистина да запре и да престане да твори и говори ? 

Џана: На знам. Веројатно доколку сите луѓе исчезнат од лицето на земјата. Но тоа очигледно уште долго нема да се случи. Затоа, да го направиме најдоброто што може од ова што го имаме. 

Оваа драма и оваа претстава се занимаваат со рушењето на интимните светови. Сите три лика (Дарја Ризова како Маша, таткото – Саша Ханџиќ и Џана Џаниќ во улогата на Нина) од оваа драма под кожа ја носат пропаста на сопствениот свет. 

Проектот е во продукција на Перипетија продукција, a во копродукција со Македонскиот народен театар и Сараевски ратни театар — САРТР од Сараево (Босна и Херцеговина).

Режија : Нина Николиќ 

Автор : Аднан Лугониќ 

Музика : Оливер Митковски 

Костимограф : Ивана Каранфиловска-Угуровска 

Сценограф : Ангел Петровски 

Четири награди за претставата ,,Нема да биде крај на светот”

Со задоволство ја објавуваме веста за освоените 4 (четири) награди на театарскиот фестивал „Живи фест“ во Босна и Херцеговина за претставата „Нема да биде крај на светот“ од авторот Аднан Лугониќ, во режија на Нина Николиќ. Со едногласната одлука на жирито во состав: Владо Керошевиќ – актер, Љиљана Чекиќ – актерка и Алмир Башовиќ – драмски писател, претставата освои: специјалната награда за режија е доделена на Нина Николиќ, наградата за најдобра актерка ја доби Дарја Ризова, наградата за најдобар актер оди во рацете на Саша Ханџиќ и специјалната награда за актерска игра ја освои Џана Џаниќ. „Нема да биде крај на светот“ првата премиерна изведба ја имаше на 18 септември во Сараевски ратни театар – САРТР, Сараево, а скопската премиера во Македонскиот народен театар се очекува кон крајот на ноември. Претставата е во продукција на Перипетија продукција – Скопје во копродукција со Македонскиот народен театар и Сараевскиот ратни театар – САРТР.
РСМ НУ Македонски народен театар

,,Нема да биде крај на светот“ вечерва во Сараевски ратни театар 

Светот застана, а ние имавме задача да го прифатиме новото „нормално“. Нашите желби, соништа, цели како да се замрзнаа … Светот стои од нашата лакомост, стои од нашата себичност и дрскост, бар сега се погледнавме и се запознавме. Сега знаеме што сме имале и колку ни била значајна слободата.

За нормалното од пред некоја година и за нормалното денес, за она што е важно и за она што мислиме дека е. За световите кои ги замислуваме, за оние кои ги градиме, но и за нивното рушење.

„Нема да биде крај на светот“ е нова театарска приказна и ново остварување на режисерката Нина Николиќ.

Премиера вечерва 18 септември – Сараевски ратни театар — САРТР, Сараево (Босна и Херцеговина)

Премиера … ноември 2021 г. – РСМ НУ Македонски народен театар, Скопје (РС Македонија)

Времетраење: 70 минути без пауза

Дарја Ризова во улога на Маша, Џана Џаниќ во улога на Нина и Саша Ханџиќ во улога на Таткото се ликовите кои ќе нè водат низ реалните семејните случувања, доволно возбудливи за да создадат претстава.

КРАЈ НА СВЕТОВИ

Аднан Лугониќ, авторот на текстот, ќе рече:

Флоскулата „крај на светот“ никогаш не била позастапена, како во медиумите така и во секојдневните, обични разговори. Стравот од генералното пропаѓање на планетата како да ги направи неважни сите оние мали, индивидуални „краеви на светови“.

Оваа драма и оваа претстава се занимаваат токму со тоа – рушењето на интимните светови. Сите три лика од оваа драма под кожа ја носат пропаста на сопствениот свет. Односно, светот каков што го замислувале за себе, за кој се бореле, кој го граделе или за кој мислеле дека ги чека, а тие требало само да му излезат во пресрет …

Краток осврт за претставата „Нема да биде крај на светот“:

Уште кога се изговара првата реплика на малата сцена, обликувана во сценски простор што треба да претставува и да наликува на т.н. дом, за сите животни потреби, но со универзална функционалност, текстот на младиот автор Аднан Лугониќ, потполно ве обзема и без никакви додатни ефекти, сосема разголено и потполно суштински, ве води низ ликовите на едно семејство — на таткото и двете сестри, а притоа атмосферата, градена од страна на младата режисерка Нина Николиќ, ја содржи автентичната животна тензија, како и големата тајна, кои се пропратен дел на реалните животни ситуации, а во современиот театарски реализам не така често можат да ве изненадат и вешто да ве водат низ лавиринтот наречен — живот.

Станува збор за животот на сцената, оној семејниот, зашто самиот живот, очигледно пишува претстави и тоа е оваа претстава, која како да е со невидливи ножици исечена од животот и пренесена на сцена …

… И така, обидувајќи се да си ги пресечеме сопствените корени како луѓе, без кои, за жал, очигледно не можеме здраво да опстанеме во општествените околности ниту пак да преживееме како успешни и перспективни личности во нив, гледаме на сцената како очајно или на трагикомичен начин сите ликови од ова семејство се обидуваат да ги состават раскршените стакленца од нивното распаднато и дисфункционално семејство, а се поврзани со животните циклуси, со траумите од минатото, со физичките предности и недостатоци на секоја животна доба.

Драмските конфликтни ситуации, каде што сите три лика се судруваат со различни индивидуални трауми, се решени на софистициран и модерен начин и без претеран тон на агресивна емоција, која е чест сопатник во конфликтните ситуации во многу современи театарски претстави, така што самите ликови се претопуваат во типови, кои ја играат и пораката, а тоа е дека сепак секој мора да живее во сегашноста, без разлика дали тоа го прави успешно или не.

Ваквото читање на текстот овозможува да се фокусирате, на авторот и на актерската игра, без да изнудува некаква емоција од вас, зашто таа сама по себе е доволно силна од самиот автор, а искрено преживеана и правилно пренесена од целата екипа на претставата.

Звездана Ангеловска – Првенка на РСМ НУ Македонски народен театар – Скопје

Режисер: Нина Николиќ

Костимограф: Ивана Каранфиловска-Угуровска

Сценограф: Ангел Петровски

Музика: Оливер Митковски (музичка адаптација);

Димитар Масевски (композиција „Магдалена“)

Соработник за македонски јазик: Ѓорѓи Јолевски