Кон “Вистинско крзно” – моќна и слоевита приказна во издание на Антолог
Кон “Вистинско крзно” – моќна и слоевита приказна во издание на Антолог
Моќна и слоевита приказна за жена што го губи своето предвремено родено синче. Тагата ја пренесува во светот на сенките на нејзините мртви предци, кои живееле во истиот дом каде што таа ги минува тешките денови по загубата.
Прилично мала книга која може да се прочита во еден здив, но нејзината содржина зборува за неколку генерации и талкања во Африка. Започнува со трагедија – предвремено родено бебе кое умира и мајка која останува скршена и сама во стан во кој се закотвени духовите на минатото – и завршува неколку недели подоцна исполнети со информации, историја, врски и испреплетени емоции. Приказната, иако се одвива на толку мал простор, е прекрасно колоритна и токму анализата и интроспекцијата на ликовите ја издигнуваат до нешто дури и поетско.
Трагедиите од Холокаустот се испреплетуваат со етичките дилеми во љубовниот триаголник во кој се заробени Јана и нејзината најдобра пријателка Тинка, чиј сопруг е и татко на изгубеното дете.
Повикот на дивата телесност се поставува наспроти поредокот на општествените односи. Модерната жена, која во еден миг им потклекнува на длабоките и необјасниви инстинкти на физичката привлечност кон мажот што би требало, според општествените конвенции, да ѝ биде само пријател, се разгранува во комплексна слика на родовите противречности низ кои се бара топлината на вистинската љубов.
Судбините на луѓето обединети од љубов и перцепцијата за една „совршена“ жена, чија несреќа ќе ја доведе до повторно раѓање. Приказна за сложени семејни односи, загуби, соништа и исто така за она што ни го пренесуваат нашите предци и како претходните однесувања може да влијаат на нашето однесување.
Хана Коларжикова пишува поетски, лесно, но во исто време многу добро може да изгради тензија и густа атмосфера што ве принудува постојано да читате.
На крајот, дали е најбитно да се преживее, но и да се пружи рака за помош дури и на озлогласениот непријател?