Македонски рок времеплов

Tag.

Датум за паметење

Датум за паметење

05.05.1990

Таа саботна вечер во култниот клуб “SKUC” во Загреб е одржан групен концерт со име “Kontravizija”. Настанот е реакција на југословенската музичка алтернативна сцена на одржувањето на Евровизиската централна манифестација, која се случува истиот ден во истиот град – Загреб. На концертот се појавува елитата на тогашната југословенска сцена: “Disciplina kicme”, “Skol”, “SCH”, “Lidija Bajuk”, Del arno bend”, “Diesel”, Shanev pirati”, “Haustor”, “Sexa”, “Gas Max”, австралијанците “Walking Seeds” и помеѓу нив и големата надеж на Југословенската сцена, македонскиот рок-бенд Архангел. Овој настан се случува кратко по објавувањето на нивниот деби албум, но почнуваат воените случувања во Југославија, па планираната голема југословенска турнеја на Архангел ќе биде откажана. Единствените промотивни концерти ќе бидат овој и скопскиот, две недели претходно.

05.05.2004

Финална вечер на 22то издание на најдолговечната манифестација која им посветува внимание на македонските демо бендови – Rock Fest. За прв пат таа година, и квалификациите и самото финале се случуваат во клубот Вулкан. Таа вечер победник ќе биде младиот скопски ска состав Таратур а Сашко Бранковски од Струшкиот бенд Decadence ја добива гитарата како награда за најдобар инструменталист на фестивалот. За време на формалниот дел на пребројување на гласовите и носење на одлука за најдобрите, публиката ја анимира победникот од претходната година, Crismon Sunrise. Покрај споменатите, финалната вечер ја уприличија тетовскиот состав Punx и скопските Палаваковци, Fusnota и Vinterthrone.

05.05.2017

Хрватскиот издавач “Geenger Records” го објавува, како винилно издание, албумот на Љубојна, Љубојна Via Битола – Битлси Via Љубојно. Името на винилната верзија на материјалот ќе биде променето во Radio Luboyna а аналогно на тоа сменето е и името на бендот, во Luboyna. Промени ќе претрпи и самиот омот на албумот. Ова е прво и за сега последно винилно издание на Љубојна, истовремено и прво македонско ворлд мјузик издание објавено на грамофонска плоча

извор: Македонски рок времеплов

Датум за паметење

Датум за паметење

09.03.2004

За првпат FxPxOx ќе се појават на заеднички сингл со некој друг бенд, во случајот со американците „My Revenge”. Ова е и прв сингл на кој се наоѓа македонски бенд, а синглот да биде во боја. Поточно постојат синглови во пет различни бои, што го прави уникатно издание во македонската дискографија. На овој сингл се наоѓа и единствената трака на FxPxOx, Straight to the point, која четири години подоцна, во малку поинаква верзија, ќе се најде и на друг винилен носач на звук, истоимениот и самостоен на FxPxOx – Straight To The Point.

09.03.2018

Во фоајето на „Кино Фросина”, се случува промоција на винилното реиздание на истоимениот деби-албум на скопската група Bastion кое за остатокот од светот ќе биде пуштено во продажба шест дена подоцна, на 16.03.2018. Ова издание е потпишано од издавачка куќа „ACC Records“ од Англија, зад која стои италијанката Флора Питроло. На промоцијата изданијата ги потпишуваа членовите на групата Кирил Џајковски, Љубомир Стојсављевиќ-Кучкар и Ана Костовска. Недостасуваше неформалниот, четврт член на групата, режисерот Милчо Манчевски. Но она што најмногу недостасуваше е настап на бендот, кој последен пат заедно има засвирено 35 години претходно, во 1985 година.

извор: Македонски рок времеплов – Тошо Филиповски

Датум за паметење

Датум за паметење

03.03.1987

1987 – во фабриката на “Jugoton” во Загреб е отпечатен првиот тираж на новиот албум на Leb I Sol. Kao Kakao е веројатно најкомерцијалниот албум на бендот ако се цени според бројот на продадени примероци, но и според бројот на хитови што ќе ги продуцира, а кои во годините што ќе следуваат, ќе бидат неизоставен дел од сет-листите на бендот. Во промотивни цели, истиот ден, „Jugoton“ ќе отпечати и едно не толку големо количество синглови со генерички кавер, кои ќе ги дели на сите радиостаници во Југославија. За радиохитови ќе бидат одбрани Femme Fatale и Kao Kakao. Со овој албум, бендот ќе започне да креира една многу поинаква звучна слика, ниту за нијанса помалку успешна од претходната, со која ќе го прошири својот круг на слушатели и меѓу популација што ја преферира поп-музиката. Новиот курс на бендот значел и враќање на клавијатурите како инструмент, што ќе ѝ даде една специфична боја на новата структура на песни. Зад клавијатурите за првпат ќе застане Кирил Џајковски. Интересно е дека за прв и последен пат во својата кариера, Leb I Sol ќе запише и еден саксофонист како полноправен член на бендот, Гоце Мицанов. Дизајнот на омотот е повторно, како и во случајот со претходниот албум, дело на Иван Станчиќ-Пико („Film“), кој на насловната страница ќе употреби уметничка слика од Пол Гоген.

03.03.1994

1994 – својот прв концерт го има новото скопско трио, кое го чинат Пеце, Кечо и Боули. На малкуте фотокопирани плакати, направени за свирката во тогаш актуелното сврталиште на алтернативната и андерграунд-сцена, клубот „Doors“, ќе пишува Superhiks. Вечер со нов ќе засвират уште помалку познатите хеви-металци, Егзекутори. На овој свој прв концерт Superhiks ги свири единствените три песни: Neighbour, Hooker и преработената Чаирска романтика на Владо Јаневски, која во нивна изведба е преименувана како Џандарска романтика. Утредента по концертот, Кечо и Пеце преземаат клучен чекор во својата штотуку започната музичка кариера, врбување на гитаристот на Егзекутори, Борис Манов-Борче, за нов член на Суперхикс. Она што следува подоцна е испишување на една од најквалитетните страници од историја на македонската музика.

извор: Македонски рок времеплов – Тошо Филиповски