Скопски џез фестивал

Оваа трета фестивалска вечер е вечер на синтези. Вечер на спојување на навидум неспојливото. Ако нешто е навистина заедничко за звуците кои ќе имаме можност да ги чуеме, тогаш тоа е неконвенционалноста, различноста, уникатната експресија.

Почнувајќи од 20 часот ќе треба да ги изострите и подготвите вашите сетила за опивачките звуци на австриската инструментална рок и џез група, Радиан. Тие се вистинска синтеза во синтезата. Овие виенски алхемичари со својот експериментален стил, спојуваат светови, хармонии и времиња.Тие својот стил го опишуваат како зумирање и фокусирање на индивидуалните звуци, како микроскопско следење на секој од звуците. Ова е група која резонира електроника и низ годините се фокусира кон себеоткривање и поглед навнатре. 

И додека сме во фаза на гледање навнатре, веројатно веќе сме се подготвиле за она што следува. Вистински џез фри стајл прикажан низ експресионизмот на нашите, домашни, а бескрајно светски артисти, џез ансамблот, Светлост. Именувани како македонско џез-чудо, овие сензибилни креативци бегаат од догмите етикетирајќи се себеси малку послободно како создатели на креативна импровизирачка музика.За нив џезот е медиум за невербална комуникација. Уживајте во нивните звуци, и верувајте….зборови нема да бидат потребни.

Вечерашното патување, веќе од 23 часот ќе стане една сосема поинаква реалност, таква во која границите и препреките престануваат да постојат, а мостот кој ќе ги поврзе луѓето, времето и настаните е ансамблот на Тригве Сеим. 

И покрај невидливите пранги на корона пандемијата кои ја притиснаа и пробаа да ја укотват музиката, вечерва, благодарение на ексклузивниот стриминг во Скопје преку Осло ќе го донесе големиот ансамбл на норвешкиот саксофонист и композитор Тригве Сеим. 

Нераскинливата врска на саксофонот, виолончелото и хармониката ќе зазвучи илјадници километри од нас, и преку илјадници километри за нас. Подгответе се за бројни мелодични и тонски изненадувања и музика која ќе создаде еден поинаков амбиент околу нас и во нас.

Денес почнува Скопскиот џез фестивал.

И кој ако не нашиот Влатко Стефановски да не поведе на патување кое ќе нè успокои и уште еднаш ќе ни потврди дека уметноста е таа која го покачува духовниот развој на човештвото.

Беспрекорен во својот занает, неуморен и секогаш отворен за импровизации кои доловуваат нови совршенства. И најважно од се, видливо безрезервен во внесување на емоција. И токму тоа е она што музиката ја чини вредна.

Теодосиј Спасов не е случаен избор на гостин, соработник, пријател.

Огромно наталожено знаење, многу искуство, длабоката љубов кон традицијата но и уникатните стилови на свирење, секој на својот инструмент, се елементите кои ги влечат да застанат на иста сцена, синтезирајќи традиционален фолклор со џез, фузија и класична музика.

Привилегираните ќе си дозволат да слушнат и меѓу редови, лакомо голтајќи од  раскошната карактерна скромност и брилијантната изведба, наедно користејќи ги како мотив за исчекорување кон повисок левел на апсорбирање на музиката и максимално уживање во нејзината благодат.

Ова е дефинитивно вечер на исклучителни соработки, вечер на совршена хемија.

Гитаристот Хуан Гомез “Чикуело” и пијанистот Мезкида се тандемот кој ќе застане на сцената на Националната опера и балет и одблиску ќе не запознае со (како што самите кажуваат) соработка која отиде подалеку, врска во која не се сомневаме. Авантурата во која се впуштија е без никакви ограничувања. Напротив! Патот по кој одат е послан со безрезервна отвореност кон импровизации и слобода секој да ја намести својата коцка…до целта која како продукт ќе даде неповторливи изведби.

И не останува ништо друго, едноставно не правете ништо друго…само препуштете се на музичко уживање.

Во лавиринтот на ова време-невреме, преплавени со прашања на кои нема одговор, протоколи кои истоштуваат а не ветуваат нешто посебно, Скопскиот џез фестивал, односно неговите организатори уште еднаш покажуваат дека ентузијазмот, знаењето, искуството, темелната посветеност, па дури и тврдоглавата упорност, се состојките кои ја чинат формулата која може да помести и граници и светови. Забележете, станува збор за заложба на поединци.

Верни на својата идеја да бидеме во друштво на најпознатите и најпрестижните европски и светски џез фестивали, и оваа година не потсетуваат дека Октомври е месецот светилник на културата, на уметноста, на џезот.

Да, време е за ЏЕЗ

Од 14-ти до 17-ти Октомври ќе имаме можност накратко да избегаме од „новото нормално“ и бројките кои проникнуваа страв и да се препуштиме на уживање во примарната емоција која води кон слобода и спасување.

Осум брилијантни изведувачки имиња од Македонија, Европа и Куба ќе се запишат во концертната историја на Националната опера и балет со што Скопскиот џез фестивал уште еднаш ја потврдува својата интернационалната нота и традицијата да го нуди најдоброто од џезот.

Скратената можност за патување на американските и норвешките музичари ќе биде надополнета со онлајн стриминг на три ексклузивни концерти од Осло и Њујорк, овозможени само за Скопскиот џез фестивал. Бесплатен стриминг пак на сите овдешни концерти ќе го направи фестивалот достапен за светот. Скопскиот џез фестивал несомнено е настан кој културно не влече нагоре, програмски едукатор, кој не само што не потклекнува, туку и инаетливо останува цврсто на нозе и силно се бори квалитетот и вистинските вредности да останат на листата на приоритети.

Впечатливи, моќни, креативни, живописни. За некого со јасна порака, за некого мистични. За сите импресивни и инспиративни со неограничени можности за индивидуално толкување и доживување. Од една крајност до друга…идентично на колоритниот контраст како неизоставен дел на секој од нив.

Се помеѓу е импровизација која својот полн сјај го доживуваа благодарение на џезот.

Постерите се вистинска атракција и креативност која со нетрпение се очекува да го најави стартот на секој следен Скопски џез фестивал чија програма овозможува богатство од задоволста за сите вљубеници во џезот. Пред самиот почеток на овогодинешното 39-то издание, “ВИДИ ЏЕЗ“ е нашиот повик со отворен ум и нескротлива имагинација да уживате низ прегледот на сите фантастични уметнички плакати кои се запишаа во историјата на Скопскиот Џез Фестивал.