Bookstar 2021

BookStar- книжевна имунизација за есенските денови

BookStar ја започнува својата имунизација на 12 октомври . Присутните ќе го добијат својот сертификат во книжевен формат, со потпис од авторот.  Дејството на оваа вакцина е доживотно, затоа што читањето книги е докажано дека го продолжува животот.  А самиот состав на имунизационата мешавина од букви и стилови, е токму тоа, генеза на различни жанрови (Genresis*)

Не е тајна, ниту изненадување дека „Антолог книжевен центар“ поставува навистина високи критериуми во македонското издаваштво. Еден од нив е и меѓународниот фестивал „BookStar“ на чиишто средби присуствуваат познати светски и европски имиња од литературната сцена. Годинава, фестивалот ќе биде отворен на 12 октомври, со гостувањето на австриската писателка Катарина Винклер, авторка на романот кој ги сруши и читателските рекорди и бариерите на женското угнетување, „Модар накит“.

На фестивалот ќе земат учество и авторите на последните книжевни остварувања преведени на македонски, во издание на Антолог : Oгнен Спахиќ(Црна Гора), Сјон(Исланд), Балсор Хоџа(Косово), Миодраг Мајиќ(Србија), Марина Вујиќ(Хрватска) и  Михаела Гашпар(Хрватска).

Затворањето на фестивалот, на 15 октомври, ќе го одбележи средбата со шведската писателка Софија Лундберј, која на македонската читателска јавност ѝ е позната по романите „Црвениот адресар“, „Прашалникот е половина срце„ и „ Дабот е сѐ уште тука“.

Од домашната сцена , на 12 октомври во 21 часот ќе биде презентирана книгата „Viola arsenica: белешки за поезијата“ од поетот Влада Урошевиќ. Особен акцент на фестивалот ќе биде ставен на творештвото на писателот Станислав Лем, во чест на стогодишнината од неговото раѓање.

Несомнено, „BookStar“ прераснува во традиција, фестивал од светски размери , па по тој повод, иницијаторот на оваа глобална книжевна имунизација, Жарко Кујунџиски изјави за Елементал:

„ Најмногу од сѐ нѐ радува тоа што BookStar постепено станува белег на почетокот на есента во Скопје, но есен со здив на ѓупско лето. Зборовите и содржините што ќе ја донесат осумте автори од различни краишта на Европа во друштво со дваесеттината македонски писатели и книжевни критичари се вистинска ренесанса на мислата и креацијата.

Она што годинава е ново на BookStar е фестивалската идеја обидинета преку терминот GENRESIS – да се преиспитаат жанровските граници и можности на литературата во време на корона. Сето тоа спакувано во внимателно одбрана и исклучително богата програма со многу изненадувања ќе направи Скопје да дише книжевна радост овие четири дена. Тоа може да биде и некоја умствена зимница што треба да нè чува во добро расположение и кондиција до следната година.“

Во продолжение проследете ја програмата:

Утре, 12.12.2021 година, во организација на Издавачката куќа „Антолог“ започнува седмото издание на Фестивалот на европската литература „BookStar“ / „Книжевни ѕвезди“, и истиот ќе траедо 15 октомври 2021 година.

Под слоганот „GENRESIS“, Фестивалот оваа година ги поставува прашањата: Дали COVID-19 е најопипливата апокалиптична форма на цивилизацијата досега? Вител во кој ќе исчезнуваме, дел по дел? Или сме исправени пред поглавје на повторно раѓање на човештвото? Втор GENESIS? И како литературата ќе си го најде своето место во овие застрашувачки моменти? Ќе треба да најде автохтон дискурс, или судбината ѝ е веќе испишана? Нови GENRES?

Европската литература како никогаш досега посегнува по своите деконструирани и раскршени крилја. Затоа, ќе мора да креира, реплицира, колекционира, конгруира. Тука, меѓу дискрепанцата на спротивставените жанрови во настанување или не-станување, се подига нов збор – GENRESIS. Зборот беше почеток, може ли сега да биде – крај?

Различностите надвладуваат, па оваа година пред македонската публика со лично присуство во Скопје ќе бидат претставени дури девет автори:

• Катарина Винклер (Австрија)

Со романот „Модар накит“ го сврте вниманието на книжевната јавност, а учествувала и во театарски и филмски продукции.

• Влада Урошевиќ (Македонија)

Еден е од најпродуктивните и најквалитетни македонски писатели.

• Огнен Спахиќ (Црна Гора)

Наградуван автор, чии книги се преведени на десетина јазици.

• Сјон (Исланд)

Исландски романсиер и поет, кој е вистинска книжевна ѕвезда во европската литература.

• Миодраг Мајиќ (Србија)

Познатиот двигател на промените во српското правосудство доаѓа во Скопје како автор на два врвни и омилени романи.

• Балсор Хоџа (Косово)

Автор на неколку книги и познат и влијателен публицист.

• Марина Вујчиќ (Хрватска)

Подеднакво активна и во театарот и во книжевноста, моментално ја извршува функцијата директорка на драмата во Хрватскиот народен театар во Сплит.

• Софија Лундберј (Шведска)

Име што уште со романот „Црвениот адресар“ стана меѓународна сензација.

• Михаела Гашпар (Хрватска)

Нејзино примарно занимање била скулптурата, но подоцна се предава успешно само на литературата.

Во фокусот на фестивалот, како и секоја година, ќе бидат промоциите на нивните дела. Покрај овие настани од главната програма, организаторите најавуваат и тркалезна маса на тема „Превод/комуникација,/разбирање“, настан во чест на 100-годишнината од раѓањето на Станислав Лем, книжевна дискусија на тема „Книжевни жанрови: систем или креативен хаос“, работилница за креативно пишување од страна на Сјон, книжевно читање „Ти реков, ми рече“, познатиот книжевен поткаст „Гол ручек“ во живо, Саем на европската литература и многу други содржини.

Дизајнот на официјалниот фестивалски постер и на другите промотивни материјали е на Стефан Танков, а настанот е организиран во соработка со Младинскиот културен центар, каде што ќе се одржат фестивалските настани.

Влезот на сите фестивалски настани е бесплатен, но задолжителен е вакцинален сертификат. За време на Фестивалот, ќе бидат почитувани сите протоколи и заштитни мерки за превенција од ширење на КОВИД-19.

Фестивалот е поддржан од Делегацијата на Европска Унија во Република Северна Македонија, Министерство за култура, мрежата „Традуки“, Градот Скопје, Амбасадата на Австрија, Амбасадата на Кралството Шведска, Амбасадата на Полска, Исландскиот книжевен центар, Младинскиот културен центар, Друштвото на писатели на Македонија и Глобал такси.