По Скопскиот џез фестивал чија програма беше вистинско освежување и можност за културно полнење на батериите, на 3-ти Ноември, од сцената во Македонска филхармонија ќе имаме можност за земање на уште една фантастична доза уживање која барем на неколку часа ќе нè тргне од секојдневните непријатни информации врзани за светски најактуелната тема која се задржа и предолго.
Имено, во рамките на овогодишниот ОФФест, извонредната каталонска пејачка Sílvia Pérez Cruz, која претежно пее на каталонски, шпански и португалски, ќе нè почести со својот исклучителен стилски израз и емотивна интерпретација како доминанта над сите јазици.
Sílvia Pérez Cruz потекнува од музичко семејство па уште од најрана возраст почнала да изучува џез пеење, пијано и саксофон. Вниманието кон себе го свртува за време на студентските денови, кога заедно со три свои пријателки ја формира фламенко групата Las Migas.
Веќе на 27 години ја започнува својата соло кариера компонирајќи музика со препознатлив личен израз. Има снимено 6 албуми, од кои два станаа „златни“, 11 de Novembre и Granada. Постојано пишува и музика за филм, театар и танцова продукција за кои се закитува со бројни награди.
Еднакво е позната во џез, фадо и во фламенко круговите а во листата на нејзини соработници се впишани музичари како Joan Manuel Serrat, Jorge Drexler, Natalia Lafourcade, Gino Paoli, Javier Colina, Hamilton de Holanda, Rocío Molina, Toquinho и многу други.
Без разлика дали пее свои песни или преработки, нејзините настапи се чист извор на образовни музички лекции кои ни ги отвораат виугите за примање високи универзални пораки и бескрајно уживање кое никако не треба да се пропушти.
автор: Бон&бона
