Автентичен музички настап на Даутовски во Аудиокултура
Во Аудиокултура се одржа уште еден „Live at Audiokultura“ настан на кој свој настап во живо реализираа Драган и Ратко Даутовски и настан на кој музиката беше многу повеќе од само музика, а изведбата многу повеќе од само настап во живо.
![](https://elemental.mk/wp-content/uploads/2023/01/thumbnail-5-1024x682.jpg)
Завчеравечер бевме сведоци на приказна во која се проткаени сите оние нишки кои ги чинат вистинските вредности врз кои се градат семејни, творечки, музички и културни градива, доволно моќни, не само да траат до бесконечност, туку и да инспирираат посветено надградување од сите идни поколенија и растеж кој ги надминува сите замислени висини. Бесценето.
![](https://elemental.mk/wp-content/uploads/2023/01/thumbnail-4-1024x682.jpg)
Настанот го отвори Михаил Теохаров, извршен директор и креатор на сѐ она што извира од Аудиокултура во форма на проекти, концепти и настани за кои на едно место се собираат оние кои сакаат да дишат чиста култура и оние кои се спремни да го следат летот и победата над празнотијата и безидејноста.
„Вечерва имам посебна чест и задоволство да најавам настап на извонредни музичари, но и драги луѓе со кои пријателството и соработката ни влечат корени од крајот од кој потекнуваме и траат преку 25 години. Имено, пред 25 години, Господинот Драган Даутовски, со изведба на 2-3 композиции, настапи на промоцијата на книга на мојот покоен дедо. Од тој настан ние сè уште чуваме аудиозапис како сведоштво на една семејна приказна и подлога која несомнено е рефлектирана и на нас како помлада генерација и предизвикала насочување токму во правец кој е тесно врзан со творештво, наука, уметност и музика. Денес, 25 години подоцна од тој настан, навистина претставува огромно задоволство што Господинот Драган и неговиот син Ратко, со очигледна радост и позитивна емоција прифатија да настапат во нашата Аудиокултура каде звучната репродукција се реализира преку Теохаров системите кои се наше производство. Сигурен сум дека вечерва ќе уживаме во извонредна музика и искрено се надевам дека и после 25 години ќе имаме можност сето ова да го повториме уште еднаш.“
![](https://elemental.mk/wp-content/uploads/2023/01/thumbnail-2-1024x682.jpg)
![](https://elemental.mk/wp-content/uploads/2023/01/thumbnail-6-1024x682.jpg)
Да, очигледно беше дека сите уживаме во заемно респектабилна комуникација и пливање во море од вредности како сведоци на сегашност, но и очигледна иднина низ кои течат убаво минато, традиција, емоција, култура и музика.
![](https://elemental.mk/wp-content/uploads/2023/01/thumbnail-8-1-681x1024.jpg)
![](https://elemental.mk/wp-content/uploads/2023/01/thumbnail-10-1024x682.jpg)
Спонтано и емотивно, дуетот Даутовски ја имаат таа моќ да те натераат со отворено срце да го слушнеш и она што е меѓу редовите на видливото, до издигнување високо над површноста и отворање нова порта кон себеспознавањето.
Нема сомнеж дека од оваа звуковна авантура во Аудиокултура излеговме побогати со значајни културни и емотивни сознанија преку кои уште полесно се љуби креативната слобода.
![](https://elemental.mk/wp-content/uploads/2023/01/thumbnail-1-1024x682.jpg)
![](https://elemental.mk/wp-content/uploads/2023/01/thumbnail-3-1024x682.jpg)
![](https://elemental.mk/wp-content/uploads/2023/01/thumbnail-7-1024x682.jpg)
![](https://elemental.mk/wp-content/uploads/2023/01/thumbnail-9-1024x682.jpg)
![](https://elemental.mk/wp-content/uploads/2023/01/thumbnail-12-1-1024x682.jpg)
Текст: Бон&Бона